Igisirikare cya Repubulika ya demukarasi ya Congo, FARDC, n’umutwe witwaje intwaro wa M23 barashinjanya kwica umusirikare wari mu butumwa bw’amahoro bw’umuryango wa Afurika y’iburasirazuba muri gurupoma ya Kibumba, teritwari ya Nyiragongo.
Mu masaha y’igicamunsi cyo kuri uyu wa 24 Ukwakira 2023 ni bwo humvikanye amakuru y’uko igisasu kiremereye cyaguye mu kigo cy’ingabo za Kenya ziri mu butumwa bwa EAC, gikomeretsa Abanyakenya benshi.
Umuvugizi w’iki gisirikare mu ntara ya Kivu y’Amajyaruguru, Lt Col. Ndjike Kaiko Guillaume, mu itangazo yahaye abanyamakuru mu masaha y’umugoroba, yatangaje ko ari M23 ari yo yakirashe.
Lt Col. Ndjike yagize ati: “FARDC iramagana igisasu cya mortier cyarashwe na M23/RDF kuri uyu wa 24 Ukwakira 2023, kikica umusirikare w’amahoro mu ngabo z’akarere ka Afurika y’iburasirazuba.”
Uyu musirikare yavuze ko iki gisasu cyarashwe mu gihe “M23 yarasaga ku birindiro bya FARDC” muri Kibumba kandi ngo “M23 yakirashe igamije kucyitirira ingabo za Leta kugira ngo umubano wazo n’ingabo z’akarere uzambe.
Ariko Perezida wa M23, Bertrand Bisimwa, mu butumwa yanyujije ku rubuga rwa X kuri uyu wa 25 Ukwakira, yasobanuye ko FARDC n’abafatanyabikorwa bayo bateguje ko bazirukana ingabo za EAC, zizwi nka EACRF, bamwe banazikangisha kuzigabaho ibitero.
Bisimwa yagize ati: “Leta ya Kinshasa n’ihuriro ryayo byanenze EACRF amezi mezi ku bwo kudakora, kandi yayikangishije kuyirukana mu Kuboza. Iri huriro ryakangishije kenshi kwica abasirikare ba EACRF.”
Perezida wa M23 yemeje ko ihuriro rya Leta ya RDC ari ryo ryarashe iki gisasu ku ngabo z’akarere. Ati: “M23 nta nyungu n’impamvu yagira mu kurasa ingabo z’akarere nk’uko Leta ya Kinshasa ibiyishinja. Ihuriro rya Kinshasa ryagabye igitero ku ngabo z’akarere, ryica umusirikare wazo, rikomeretsa izindi. Rigomba kwirengera iki gikorwa.”
Umuyobozi n’abavugizi ba M23 mu gitondo cyo kuri uyu wa 24 Ukwakira 2023, basobanuye ko FARDC n’abafatanyabikorwa bayo barimo FDLR, Wazalendo n’abacancuro ari bo bagabye igitero mu bice igenzura muri Kibumba, bikaba byabaye intandaro y’imirwano yahabaye.
