Igisirikare cya Repubulika ya Demokarasi ya Congo (FARDC) n’abafatanyabikorwa bacyo kuri uyu wa Kabiri babyutse basuka ibisasu mu bice bituwe cyane muri Minembwe, mu Ntara ya Kivu y’Amajyepfo.
Itangazo ryashyizwe ahagaragara na AFC/M23 rivuga ko kuri uyu wa Kabiri, itariki 3 Werurwe 2026, ku isaha ya saa kumi n’imwe z’igitondo ihuriro ry’ingabo z’ubutegetsi bwa Kinshasa, harimo FARDC, FDNB, FDLR n’abacanshuro b’abanyamahanga bagabye igitero, bakoresheje drones n’imbunda zirasa kure, mu bice bituwe cyane i Gakenke no mu nkengero zaho muri Minembwe.
Ibi bitero ngo byibasiye abaturage b’abasivili ndetse n’ibirindiro bya AFC/M23 nk’uko itangazo ryashyizwe ahagaragara n’Umuvugizi wa AFC/M23, Lawrence Kanyuka, rivuga.
Muri aka kanya, ngo ingabo za AFC / M23 ziteguye byimazeyo kwirwanaho no kurinda abaturage b’abasivili. Zikorana ubushake, disipuline, ndetse no kumva ko bafite inshingano zo gukunda igihugu imbere y’ihuriro ry’abagizi ba nabi ryiyemeje kubiba urupfu no kurimbura nk’uko itangazo risoza rivuga.
