Igisirikare cya Repubulika Iharanira Demokarasi ya Congo, FARDC, cyemeje ko Général-Major Peter Nkuba Cirimwami wari Guverineri wa Gisirikare w’Intara ya Kivu y’Amajyaruguru yishwe na M23.
FARDC yemeje aya makuru kuri uyu wa Gatanu biciye mu muvugizi wayo, Général-Major Sylvain Ekenge. Byari nyuma y’inama nkuru ya gisirikare yayobowe na Perezida Félix Antoine Tshisekedi.
Ekenge yavuze ko Cirimwami “yaguye ku rubuga rw’icyubahiro (ku rugamba)”.
Amakuru avuga ko Gen Cirimwami yarashwe amasasu atatu, arimo iryo mu ijosi, mu gituza ndetse no mu kaguru.
FARDC ivuga ko nyuma yo gukomeretswa “ibishoboka byose byarakozwe kugira ngo azanwe i Kinshasa guhabwa ubuvuzi bukwiye, ku bw’ibyago apfa azize ibikomere.”
Igisirikare cya Congo cyemeje ko uriya Jenerali yapfuye nyuma y’amasaha menshi umutwe wa M23 utangaje ko wamurasiye mu gace ka Kasengezi aho yari yagiye ku rugamba kwifotoza.
