Fernando Santos wari umutoza w’Ikipe y’Igihugu ya Portugal, yamaze kwirukanwa nyuma yo kwitwara nabi mu mikino y’Igikombe cy’Isi cya 2022.
Inkuru y’iyirukanwa ry’uyu mutoza yatangajwe n’umunyamakuru Fabrizio Romano uri mu bakomeye ku Isi.
Santos yirukanwe nyuma y’uko Portugal yatozaga isezerewe mu gikombe cy’Isi, nyuma yo gutsindirwa muri ¼ cy’irangiza na Maroc igitego 1-0.
Ni mu gihe Portugal iri mu makipe yahabwaga amahirwe yo kwegukana Igikombe cy’Isi cya 2022 kiri mu nzira zo gusozwa muri Qatar.
Mu byo uyu mutoza yagiye akunda kunengwaho ni ukudaha umwanya uhagije Kapiteni Cristiano Ronaldo, mu gihe uyu rutahizamu ari we Portugal imaze igihe igenderaho.
Fernando Santos yari umutoza wa Portugal kuva muri 2014. Mu myaka umunani yari amaze ayitoza igikomeye yayigejejeho ni ugutwara Igikombe cy’u Burayi (Euro) cyo muri 2016 ndetse n’icya UEFA Nations league cya 2019.
Uyu mutoza yirukanwe akurikira abarimo Roberto Martinez wamaze gutandukana n’u Bubiligi, Tite watozaga Brésil cyo kimwe na Luis Enrique watozaga Espagne.
