Ishyirahamwe ry’umupira w’amaguru mu Rwanda (FERWAFA) ryatangaje ko ryamaze gushyikiriza Komisiyo Ngengamyitwarire ikibazo cy’amajwi yacicikanye ku mbuga nkoranyambaga no mu bitangazamakuru, yumvikanamo ikiganiro cyo kuri telefone hagati y’umutoza wungirije wa Muhazi United FC, Mugiraneza Jean Baptiste, n’umukinnyi wa Musanze FC, Bakaki Shafiq.
Mu itangazo FERWAFA yashyize ahagaragara, yavuze ko iyi komisiyo ari yo izakurikirana iki kibazo hakurikijwe amategeko ngengamyitwarire y’iri shyirahamwe.
Nubwo FERWAFA itatangaje byinshi ku byumvikanye muri ayo majwi, bamwe mu bakunzi b’umupira w’amaguru batangaje impungenge zabo ku cyaba cyihishe inyuma y’iki kiganiro.
Komisiyo Ngengamyitwarire ni yo ifite inshingano zo kugenzura no gufata ibyemezo ku bibazo bijyanye n’imyitwarire mibi mu mupira w’amaguru.
FERWAFA yasabye abakunzi b’umupira w’amaguru gutegereza umwanzuro w’iyi komisiyo, ivuga ko izakomeza gutanga amakuru ku cyemezo kizafatwa.
