Icyamamare mu mikino w’iteramakofe Floyd Mayweather, yiyemeje kuzishyura buri kimwe cyose kigendanye n’ishyingurwa ndetse n’ikiriyo nya George Floyd uherutse kwitaba Imana yishwe n’umupolisi w’umuzungu muri Minnesota ho muri Leta Zunze Ubumwe za Amerika.
Ibi byatangajwe n’Umuyobozi mukuru wa Mayweather Promotions Leonard Ellerbe, wavuze ko ibizasabwa byose mu muhango wo guherekeza George Floyd azabitanga nk’inkunga ye mu muhango uteganyijwe kuwa 09 Kamena 2020 mu mujyi Floyd avukamo I Houston.
George Floyd yapfuye tariki ya 25 Gicurasi bitewe n’umupolisi wamupfukamye ku ijosi kugeza ashizemo umwuka. Urupfu rwa Floyd rwateye imyigaragambyo ikomeye ndetse hamwe na hamwe muri Leta Zunze Ubumwe za Amerika irimo n’ibikorwa birimo urugomo.
Uretse kwishyura ibizagenda mu muhango wo gushyingura George Floyd, TMZ dukesha iyi nkuru yatangaje ko Mayweather azanishyura ibizakoreshwa mu kwibuka George Floyd mu ntara nka Minnesota na North Carolina.
Umujinya w’abigaragambya umaze gufata Indi ntera aho leta 50 zose zimaze kuberamo ibikorwa byo kwigaragamba, 22 muri zo zikaba zaroherejwemo abapolisi n’abasirikare kabuhariwe mu guhosha imyigaragambyo.Umuvandimwe wa Floyd witwa Rodney mu kiganiro na CBS, we arasaba abigaragambya guhagarika ubugizi bwa nabi kuko yemeza ko ari na cyo umuvandimwe we yagasabye abaye yabashaga kureba ibiri kuba.
Mayweather afatwa nk’umuteramakofe mwiza kurusha abandi mu gihe cye,mbere yo kuva muri uyu mukino mu mwaka wa 2017 yatsinze ibindi byamamare nka Manny Pacquiao, Canelo AlHoya na Miguel Cotto.
