Ni gariyamoshi igendera ku muvuduko wo hejuru ihuza imijyi ya Beijing na Guangzhou ku ntera ya Km 2300. Urugendo rukubye Kigali – Dare salaam hafi inshuro ebyiri.
Ubushinwa n’igihugu cya kane mu bunini ku isi bityo kugitembera ukoresheje gariyamoshi y’amashanyarazi ni nku murabyo kubera umuvuduko wayo udasanzwe aho yirukanka Km 350/h.
Muri iyi nkuru turagaruka ku rugendo ruhuza umujyi wa Guangzhou na Beijing mu ntera ya km 2300. Uyu muhanda wa gariyamoshi inyaruka cyane uhuza iyi mijyi ibiri ikomeye mu Bushinwa niwo muremure ku isi mu gihugu cyimwe.
Izi gariyamoshi zizwi ku izina rya TGV cyangwa Bullet Train zikoresha amasaha umunani yonyine ziva Guangzhou zerekeza mu murwa mukuru w’Ubushinwa Beijing ahantu imodoka igenda iminsi 3.
Imirimo yo kubaka uyu muhanda uhuza imijyi 28 yatangiye mu 2005 ukaba uhuza imijyi ya Beijing na Guangzhou mu majyepfo y’Ubushinwa ndetse n’imijyi ya Shenzhen na Hongkong.
Gariyamoshi (TGV) yagabanyijeho kimwe cya kabiri cy’urugendo rwahuzaha iyi mijyi ikomeye cyane mu Bushinwa, ikaba yarafunguwe ku mugaragaro ku ya 23 Nzeri 2018.
Imiterere ya TGV zo mu Bushinwa
Iyo uri muriyi gariyamoshi mu byukuri ntaho itandukaniye no kuba wicaye mu ndege. Kuko ibyangombwa byose indege ifite, nizi TGV zirabifite usibye kuguruka mu kirere
Izi Gariyamoshi zihuta zituma utarambirwa n’urugendo kubera zifite intebe zagutse hamwe n’amadirishya manini atuma wishimira ibyiza nyaburanga bigize igihugu cy’Ubushinwa.
Umuvuduko: NI TGV igendera ku ku muvuduko wo hejuru wa Km 350 / h, aho guhuza Beijing-Guangzhou inyuze mu mijyi 28 harimo izwi cyane nka Wuhan na Zhengzhou ikoresha amasaha 8 gusa.
Ibikorwaremezo niyo nkingi y’iterambere ryihuse mu gukura abaturage mu bukene. Umuhanda wa gariyamoshi nkuyu wo mu Bushinwa, uhuje Dar Salam-Kigali, wajya ukoresha amasaha 4 yonyine aho kuba iminsi itatu.
