Urukiko Rwisumbuye rwa Gasabo kuwa 17 Gashyantare rwaburanishije urubanza Ubushinjacyaha buregamo umugore w’imyaka 34 ukekwaho gusambanya umwana w’umuhungu w’imyaka 14 y’amavuko.
Icyaha akurikiranweho cyakozwe ku itariki ya 31 Ukuboza 2025 no ku itariki ya 03 Mutarama 2026 mu Mudugudu Karenge, Akagari ka Nyakabungo, Umurenge wa Jali, mu Karere ka Gasabo.
Uregwa akurikiranweho kuba kuri ayo matariki yarasambanyije uyu mwana nyuma akamushukisha amafaranga 1000 Frw kugira ngo atazabivuga nk’uko bitangazwa n’Ubushinjacyaha Bukuru.
Mu rubanza, uregwa yaburanye yemera icyaha. Asobanura ko uwo mwana ari we wamusabye ko basambana kuko we asanzwe akora akazi ko kwicuruza (uburaya). Urubanza rwarapfundikiwe, ruzasomwa ku itariki ya 23/02/2026.
Icyaha cyo gusambanya umwana uregwa akurikiranweho gitenywa kandi kigahanishwa ingingo ya 14 y’Itegeko nº 059/2023 ryo ku wa 04/12/2023 rihindura itegeko nº 68/2018 ryo ku wa 30/08/2018 riteganya ibyaha n’ibihano muri rusange.
