Ikipe ya Gasogi United ikomeje kwiyubaka, yamaze gusinyisha rutahizamu Emmanuel Bola Lobota ukomoka muri Repubulika Iharanira Demokarasi ya Congo wifuzwaga n’ikipe ya Rayon Sports.
Uyu rutahizamu usanzwe ukinira ikipe y’igihugu cye, yasinye imyaka ibiri muri Gasogi United nk’uko iyi kipe yabyemeje.
Gasogi United ibinyujije kuri Twitter yagize iti”Birabaye birabaye! Misile Mpuzamahanga kirimbuzi akaba ari Bola Lobota Emmanuel, rutahizamu mpuzamahanga ukinira ikipe y’igihugu ya Congo. Yamaze gusinyira ikipe ya Gasogi United amasezerano y’imyaka ibiri. Ibyishimo ni yo ntego.”
Emmanuel Bola Lobota w’imyaka 20 y’amavuko, yakiniraga ikipe ya AS Vita Club y’iwabo muri Repubulika Iharanira Demokarasi ya Congo, akaba anasanzwe ahamagarwa mu kipe y’igihugu, Les Léopards.
Uyu rutahizamu yigeze kuza muri Rayon Sports muri Kamena 2019, ariko birangira atumvikanye na yo. Byavugwaga ko Rayon Sports ishobora kumugura miliyoni 18 Frw, igice kinini kikaba ideni, akajya ahembwa 800,000 Frw.
Magingo aya uretse uyu Mukongomani, Gasogi United imaze gusinyisha abandi bakinnyi barimo rutahizamu Iradukunda Jean Bertrand wavuye muri Mukura VS, Mfashingabo Didier wavuye muri Etoile de l’Est, myugariro Beya Beya Hervé ukomoka muri Repubulika Iharanira Demokarasi ya Congo, Bugingo Hakim wakiniraga Rwamagana City na Nzitonda Eric wahoze ari Kapiteni wa Gicumbi FC.
