Gen. Major Gihanga Mutara Smith, umuyobozi wa FARDC muri Haut Katanga wari umaze ukwezi kurenga afunzwe mu rwego rw’iperereza yongeye kwidegembya.
Uyu musirikare wakekwagaho uruhare mu inyerezwa rya toni 120 za cuivre z’ikigo TFM, yarekuwe kuri uyu wa Gatandatu, itariki 7 Ukwakira 2023 nk’uko bitangazwa n’umunyamakuru Pascal Mulegwa, uhagarariye ibitangazamakuru nka RFI na France 24 muri RDC.
Gen Gihanga yatawe muri yombi ku itariki ya 23 Kanama, n’urwego rw’ubutasi bwa gisirikare (ex DEMIAP) i Kinshasa akekwaho ubujura bwa toni 120 za cuivre cathodes z’isosiyete ikora ubucukuzi bw’amabuye y’agaciro yitwa Tenke Fungurume Mining.
Ku itariki ya 30 Kamena, nibwo imodoka eshatu zitwaye toni 120 z’umuringa zari zivuye muri sosiyete ya Tenke Fungurume Mining (TFM) zafashwe zijyanwa ku cyicaro gikuru cy’akarere ka 22 ka gisirikare i Lubumbashi.
Nyuma rero zajyanwe ahantu hatazwi ndetse bituma uwahoze ari Minisitiri w’ubutegetsi bw’igihugu w’intara atungwa urutoki ndetse hasohorwa impapuro zo kumuta muri yombi. Nyuma yaje gufatwa afungirwa i Kinshasa hamwe n’abandi bantu barimo uyu wari umuyobozi mukuru w’akarere ka 22 ka gisirikare muri Haut-Katanga.
