Umugaba w’Ikirenga w’ingabo za Uganda, Yoweri Museveni, agiye gusezerera abasirikare 10 bafite amapeti ari mu cyiciro cya General barimo Edward Kalekezi (Kale) Kayihura wari ugikurikiranwa n’ubutabera.
Itangazo ryo kuri uyu wa 3 Nyakanga ryashyizwe hanze n’Umuvugizi w’ingabo za Uganda, Brigadier General Felix Kulayigye, risobanura ko aba basirikare bazasezererwa ku mugaragaro tariki ya 31 Kanama 2023.
Abandi bazasezererwa ni: Lieutenant General James Nakibus Lakala, Major General Joseph Wasswa Mutesasira, Maj. Gen. Joseph Arocha, Maj. Gen. David Wakaalo, Brigadier General Austin Kasatwooki Kamanyire, Brig. Gen. Stephen Oluka, Brig. Gen. Frank Katende Kyambadde, Brig. Gen. Emmanuel Kwihangana, Brig. Gen. Wilson Muhabuzi na Brig. Gen. Ham Atwoki Kaija.
Kuri General Kayihura, by’umwihariko, biteganyijwe ko azasezererwa mu ngabo mu cyubahiro ubwo ubushinjacyaha bw’igisirikare buzaba bwaramaze guhagarika ibirego bumukurikiranyeho bifitanye isano n’umutekano muke.
Nyuma y’uyu muhango hazaba undi wo gusezerera abandi bofisiye 99, kuva ku bafite ipeti rya Major kugeza ku bafite irya Colonel.
