Minisitiri wo muri Israel ushinzwe ingufu n’amazi, Karine Elharrar yangiwe kugera mu cyumba cyari kigiye kuberamo inama ya Cop26 yiga ku guhangana n’ihindagurika ry’ikirere, bitewe n’uko yari ku kagare k’abafite ubumuga.
The Guardian dukesha iyi nkuru ivuga ko ubwo Minisitiri Karine yageraga ku marembo, abateguye iyi nama bamukumiriye, amara amasaha abiri hanze ategereje ko yemererwa kwinjira ariko biba iby’ubusa.
Byatumye Minisitiri Karine afata icyemezo cyo gusubira muri hoteli acumbitsemo, muri Edinburg.
Mu butumwa yanyujije kuri Twitter, uyu muyobozi yasobanuye iby’aya maherere ati: “Naje muri Cop26 guhura na bagenzi banjye baturutse ahatandukanye ku Isi, nje gutanga uruhare mu rugamba rwo kurwanya ihindagurika ry’ikirere. Birababaje ko UN ishyigikira abafite ubumuga, mu 2021 idashyiraho uburyo bwo kubafasha muri iyi nama.”
Minisitiri w’Ibidukikije w’u Bwongereza, George Eustice yasabye imbabazi Karine ati: “Turicuza kubera ibyabaye” ariko anasobanura ko kutemererwa kwinjira k’uyu muyobozi kwatewe no kutamenya, kuko abateguye iyi nama ngo ntibari bazi ko bakira ugendera ku kagare ku buryo bari gutegura uko bamufasha kwinjira.
Eustice yasobanuye ati: “Nzi ko ahandi henshi binjirira, utugari tw’abafite ubumuga tuhanyura. Byatewe n’uko yaje kwinjirira ahantu hatari ubwo bufasha.”
Ambasaderi w’u Bwongereza muri Israel, Neil Wigan hamwe na Minisitiri w’Ububanyi n’Amahanga James Cleverly nabo batangaje ko bababajwe n’ikibazo Minisitiri Karine yagiriye ahabereye inama ya Cop26.
Iyi nama iri kubera mu mujyi wa Glasgow muri Scotland, kimwe mu bihugu bigize Ubwami bw’u Bwongereza, guhera tariki ya 31 Ukwakira kugeza ku ya 12 Ugushyingo 2021.
