Leta ya Guinée Equatoriale yirukanye umukozi wari uhagarariye Ishami ry’Umuryango w’Abibumbye ryita ku buzima (OMS) ku butaka bwayo imushinja gutangaza amakuru atari yo ku cyorezo cya coronavirus.
Dr Triphonie Nkurunziza arashinjwa na Leta yakoreragamo gutanga imibare itari ukuri ku bijyanye n’uko icyorezo cya coronavirus gihagaze mu gihugu cya Guinée Equatoriale.
Ibiro ntaramakuru by’abafaransa AFP dukesha iyi nkuru, bivuga ko kuwa Gatanu ushize Minisitiri w’Intebe Pascal Obama Asue yari yagejeje kuri Sena icyemezo Leta yafatiye uyu mukozi wa OMS ndetse bikaza no gutangazwa kuri Televiziyo y’igihugu. Minisitiri w’Intebe Asue yagize ati” Nta kibazo dufitanye na OMS, dufitanye ikibazo n’uyihagarariye mu murwa mukuru I Malabo.”
AFP isubiramo amagambo y’umukozi wa OMS yagize iti “Leta yamusabye [Dr Triphonie Nkurunziza] kugenda, twabonye inyandiko bikubiyemo. Arashinjwa gutangaza imibare itari ukuri ku cyorezi cya Covid-19”.
Dr Triphonie Nkurunziza ntacyo aratangaza ku mwanzuro wamufatiwe ndetse aracyari i Malabo kubera ko nta ndege ihamukura ihari gusa, imibare itangazwa na OMS n’itangazwa na leta kugeza ubu ni imwe mu gihugu cya Guinée Equatoriale nk’uko AFP ikomeza ibivuga.
Kuri ubu muri iki gihugu imibare igaragaza ko abantu 1,306 ari bo bamaze kwemezwa ko banduye coronavirus, 12 muri bo imaze kubahitana naho 200 barayikize.
