Abashakashatsi bo muri Brazil ku bufatanye n’abo muri Kaminuza ya Hong Kong bavumbuye virusi nshya ya Coronavirus ishobora no kwandura mu bantu.
Iyi virusi nshya yagaragaye nyuma y’uko abashakashatsi bapimye ibipimo bafashe mu kanwa no mu rwungano ngogozi by’uducurama.
Abahanga basanze iyi virusi ifitanye isano ya hafi na MERS, indwara izwiho kugira ubukana bukomeye kandi yica 35% by’abayanduye.
Ikibabaje kurushaho ni uko iyi virusi nshya ifite imiterere y’agace kayo kitwa spike protein, gashobora kwinjira mu turemangingo tw’umuntu. Iyi mikorere ishatse gusobanura ko ishobora no kwandura mu bantu.
Iyi virusi yamaze koherezwa mu Bushinwa hamwe n’izindi virusi esheshatu zavumbuwe muri ubu bushakashatsi kugira ngo hakorwe igerageza ryimbitse. Gusa, hari impungenge ko ubushakashatsi nk’ubu bushobora kugira uruhare mu gutera ibibazo nk’ibyabaye mu gihe cya COVID-19.
Dr. Bruna Silverio wo muri Kaminuza ya São Paulo, umwe mu bagize iyi gahunda, yavuze ati:
“Ubu turacyagenzura niba iyi virusi ishobora kwandura mu bantu. Ariko twabonye ibice by’iyo virusi bifite ubushobozi bwo kwinjira mu turemangingo tw’inyamaswa, bivuze ko bishobora no kugira ingaruka ku bantu nka MERS-CoV.”
