Ikigega Mpuzamahanga cy’Ubukungu ku Isi, IMF cyasohoye urutonde rw’ibihugu 10 byazamutse mu bukungu mu mwaka wa 2019, rukaba rwagaragayeho ibihugu bibiri byo mu Muryango w’Afurika y’Iburasirazuba (EAC) ari byo Tanzania na Kenya.
Ni urutonde rwakozwe hagendewe ku ngano y’amafaranga agize umusaruro mbumbe abaturage b’igihugu binjije mu mwaka wa 2019 (DGP) ndetse n’ikigereranyo cy’umusaruro w’ibyo buri muturage yinjiza ku mwaka.
1. Nigeria
Nigeria ni igihugu gituwe n’abaturage bangana na miliyoni 201, mu mwaka wa 2019 kikaba cyarinjije umusaruro mbumbe wo hagati mu gihugu ungana na miliyari 450 z’Amadolari y’Amerika, avuye kuri miliyari 376.284$ cyari cyabonye mu 2017 ubwo na none cyari ku mwanya wa mbere.
Bimwe mu byo iki gihugu gikesha ubukungu bwacyo butuma kiza ku mwanya wa mbere muri Afurika harimo ubucukuzi bw’amabuye y’agaciro, peteroli n’ibihingwa bitandukanye bitunganyirizwa mu nganda. IMF ivuga ko muri 2019 umuturage wa Nigeria yabashije kwinjiza 2200$.
2. Afurika y’Epfo
Iki gihugu giherereye mu majyepfo y’umugabane w’Afurika gituwe n’abaturage bangana na miliyoni 58.6. Mu mwaka ushize w’2019 cyinjije umusaruro mbumbe wa miliyari 360$, na ho umuturage ku giti cye akaba yarinjije 6100$.
3. Egypt
Igihugu cya Egypt (Misiri) kiza ku mwanya wa gatatu mu bihugu byazamuye ubukungu bwacyo mu 2019 kuko kinjije miliyari 300$, kikaba gituwe n’abaturage miliyoni 100. Umusaruro wa buri muturage ku giti cye ungana na 3000$ ku mwaka.
4. Algeria
Ituwe na miliyoni 43.1, ikaba yarinjije umusaruro mbumbe ungana na miliyari 170$. Umuturage wo muri Algeria yabashije kwinjiza 4000$ mu mwaka wa 2019.
5. Marroc
Iki gihugu gituwe na miliyoni 35.5, cyinjije umusaruro mbumbe wa miliyari 120$. Umuturage wa Marroc mu 2019 yabashije kwinjiza umusaruro ungana n’3300$.
6. Kenya
Iki gihugu kiri mu bigize Umuryango w’Afurika y’Iburasirazuba (EAC) gituwe n’abaturage bangana na miliyoni 52.6. Kenya yinjije umusaruro mbumbe ungana na miliyari 99$, naho umuturage wayo abasha kwinjiza 1900$ mu 2019.
7. Angola
Angola ituwe na miliyoni 31.8, kikaba ari igihugu cyaranzwe n’umuvuduko w’ubukungu muri iyi myaka itanu ishize. Mu 2019, Angola yinjije miliyari 92$ mu gihe umuturage wayo ku giti cye yabashije kwinjiza 2900$.
8. Ethiopia
Ethiopia ituwe na miliyoni 112, ikaba yarinjije miliyari 91$. Ikigereranyo cy’umusaruro umuturage wo muri iki gihugu yinjije mu 2019 ni 800$.
9. Ghana
Ghana ituwe na miliyoni 28.8 ikaba ifite umusaruro mbumbe wa miliyari 67$, mu gihe umuturage wayo yinjije 2300$.
10. Tanzania
Tanzania ibaye igihugu cya kabiri cyo mu muryango wa EAC cyinjiye ku rutonde rw’ibihugu 10 bikize muri Afurika. Ituwe na miliyoni 58 z’abaturage ikaba yarinjije miliyari 62$. Umuturage wa Tanzania yabashije kwinjiza 1100$ mu 2019.
