Abaturage bo muri Repubulika ya Centrafrica bakomeje guhungira mu bihugu by’abaturanyi kuva mbere y’amatora y’Umukuru w’Igihugu yabaye tariki ya 27 Ukuboza 2020.
Impamvu ituma bahunga nk’uko Umuryango Mpuzamahanga wita ku mpunzi (HCR) ubivuga ni ibibazo by’umutekano muke uterwa n’imitwe yitwaje intwaro irwanya ubutegetsi, ikomeje kugaba ibitero mu bice bitandukanye by’igihugu.
Radio Okapi ikorera muri Repubulika ya Demukarasi ya Congo (RDC) ivuga ko guhera tariki ya 24 Ukuboza, habura iminsi itatu ngo amatora yo muri Centrafrica abe, ari bwo abaturage bo muri iki ghugu batangiye kuva iwabo, binjira ku butaka bwa RDC mu Ntara za Nord na Sud Ubangi ndetse na Bas-Uélé.
HCR ivuga ko kugeza mu mpera z’iki cyumweru gishize, yari imaze kubarura abaturage ba Centrafrica 90,000 bashaka ubuhungiro muri izi ntara eshatu za RDC.
Abenshi muri bo nk’uko iki gitangazamakuru kibivuga, ni abaturutse mu bice birimo umujyi wa Béma, Bangassou ndetse n’umurwa mukuru wa Centrafrica, Bangui.
Tariki ya 15 Mutarama 2021, Umuvugizi wa HCR, Boris Cheshirkov yatangaje ko umubare w’abaturage bari bamaze guhungira mu bihugu by’abaturanyi wikubye kabiri mu cyumweru kimwe gusa, agira ati: “Bigaragara ko ibintu birushaho kuba bibi, twasanze umubare w’impunzi warikubye kabiri mu cyumweru kimwe.”
Icyo gihe, abaturage ba Centrafrica bari bamaze guhunga babarirwaga mu 120, barimo 50,000 bari bamaze guhungira muri RDC, 9,000 bari bahungiye muri Cameroon, abandi batatangarijwe umubare bari bahungiye muri Repubulika ya Congo na Chad ndetse n’abahungiye mu bindi bice by’igihugu cyabo babarirwaga mu 58,000.
