Ubuyobozi bw’ibitaro bikuru bya Ruhengeri kuri uyu wa 11 Gicurasi 2021 bwasobanuye icyishe impinja 19 zavutse zitagejeje igihe muri Werurwe.
Inkuru y’izi mfu yashyizwe ahagaragara mu ntangiriro z’uku kwezi, na bamwe mu bakorera muri ibi bitaro batifuje ko Bwiza itabatangariza amazina ku bw’umutekano wabo mu kazi.
Umwe muri bo yabwiye iki gitangazamakuru ko mu cyumweru kimwe mu minsi yashize, izi mpinja 20 zari mu cyumba cyihariye zikurikiranirwamo (Neo) zapfuye, izigifite ubuzima zimurirwa ahandi.
Yagize ati: “Icyorezo cyaje muri Neo, hakaza ibisimba bimeze nk’ibiheri, byarumaga abana bagahita bapfa”, avuga ko nyuma yo kwimura izi mpinja, Neo yahise isukurwa ndetse inaterwa amarangi. Ati: “Ubu bateyemo imiti, ndetse banasigamo amarangi.”
Umuyobozi Mukuru w’ibi bitaro, Dr Muhire Philbert, icyo gihe yasobanuriye Bwiza ko nta “mpinja 20 zapfuye” ko ahubwo hapfuye 10, zirimo 7 zapfuye mu byumweru bibiri bibanza bya Werurwe n’izindi 3 zapfuye mu cyumweru cya gatatu, zishwe n’icyorezo kitari cyakamenyekanye.
Dr Muhire yagize ati: “Ni byo koko habayeho icyorezo mu kwezi gushize, duhita dufata ingamba zo kugikumira nk’ibisanzwe. Mu byumweru bibiri bibanza twapfushije impinja zirindwi mu cyumweru cya gatatu dupfusha izindi eshatu.”
Soma iyi nkuru bifitanye isano http://bwiza.com/?Haravugwa-impfu-z-impinja-20-mu-cyumweru-kimwe-muri-Neo-y-Ibitaro-bya-Ruhengeri
Impinja zapfuye ni 19
Ibitaro bya Ruhengeri mu itangazo byashyize ahagaragara kuri uyu wa 11 Gicurasi, byasobanuye ko impinja zishwe n’iki cyorezo muri Werurwe ari 19.
Biti: “Ibitaro bya Ruhengeri byagize umubare w’imfu z’abana bavuka batagejeje igihe wazamutse mu buryo budasanzwe mu kwezi kwa Gatatu 2021. Abana 19 bitabye Imana mu byumweru 4 bigize ukwezi kwa Gatatu 2021.”
Iri tangazo rikomeza rivuga ko ubwo izi mpinja zapfaga, byaketswe ko ziri kwicwa n’uburwayi buterwa na mikorobe (microbes) zidakangwa n’imiti isanzwe ikoreshwa mu kurwanya andi moko ya mikorobe, hakorwa ubushakashatsi muri Laboratwari, bigaragara ko koko Neo yari yibasiwe n’ubwoko bubiri bw’izi mikorobe.
Nyuma y’ibyavuye mu bubashakashatsi, ibitaro bya Ruhengeri bisobanura ko byafashe ingamba zirimo: kwimura abana bakiri bazima, kuvura abarwaye hifashishijwe umuti wihariye wabafasha guhangana n’ubu bwoko bubiri bwa mikorobe, kwimura abaganga bari muri Neo no gusukura aha hantu, hifashishijwe umuti uhangana n’izi mikorobe.
Ibi bitaro byizeza ababigana ko iki kibazo cyakemutse, ko kandi Neo nyuma yo gusukurwa hifashishijwe iyi miti yongeye gukoreshwa.
Kurikira ibiganiro n’amavidewo binyura kuri Bwiza TV
