Abayobora urubyiruko mu turere tw’Intara y’Iburasirazuba bagaragarije ikigega cya leta gishinzwe guteza imbere imishinga mito n’iciriritse ko urubyiruko rukwiye guhabwa umwihariko mu rwego rwo kurworohereza kubona inguzanyo z’imishinga irimo iy’ubuhinzi .
Ibi babigagarije mu Karere ka Rwamagana mu biganiro byitabiriwe n’abayobozi batandukanye barimo abayobozi bungirije b’uturere bashinzwe iterambere ry’ubukungu, abahuzabikorwa b’Inama y’Igihugu y’urubyiruko, iya abantu bafite ubumuga ndetse n’Inama y’Igihugu y’abagore mu turere. Ibi biganiro byanitabiriwe n’abayobozi b’ibigo by’imari, abikorera abahagarariye ihuriro ry’urubyiruko rukora ubuhinzi n’ubworozi ndetse n’abikorera mu ngeri zitandukanye.
Umuhuzabikorwa w’Inama y’Igihugu y’urubyiruko mu Karere ka Rwamagana, Munyaneza Isaac, yasabye ko urubyiruko rufite imishinga y’ubuhinzi n’indi rukwiye koroherezwa kubona amafaranga muri gahunda y’inguzanyo zitangwa na BDF ibinyujije mu bigo by’imari.
Yagize ati ” Hari inguzanyo ihabwa urubyiruko rwize ubuhinzi rushoje nibura icyiciro cya Kaminuza mu Ishami ry’ubuhinzi , icyifuzo twatanga twebwe abahagarariye urubyiruko, nuko urubyiruko rwishyize hamwe rufite icyangombwa cy’akagari kigaragaza ko rukora ubuhinzi bw’umwuga bajya bahabwa amahirwe yo guhabwa amafaranga yo kuganira umushinga wabo kuko iyo abantu iyo bakorera hamwe bitanga icyizere cyo kwishyura neza .”
Munyaneza yanakomeje agaragaza ko urubyiruko rwize Imyuga narwo rukwiye guhabwa umwihariko mu kurufasha kubona ibikoresho birufasha kunoza Imyuga bize ikarufasha kwihutisha iterambere no guhanga udushya mu byo rukora.
Umuhuzabikorwa w’Inama y’Igihugu y’urubyiruko mu Karere ka Kayonza, Rukundo Pacifique, nawe yagaragaje ko urubyiruko imishinga rukora ihura nk’imbogamizi mu gihe rwifuza guhabwa inguzanyo z’imishinga zitangwa n’amabanki binyuze muri BDF.
Ati: “Inguzanyo nyinshi zisabwa n’abantu benshi, bijyanye n’ubushobozi buhari , urubyiruko,impamvu bagira imbogamizi kurusha abandi, abenshi baba bafite imishinga igitangira, icyo gihe biba byoroshye ko banki itoranya umushinga w’ usanzwe akorana na banki yishyura neza.”
Yungamo ati: “Imishinga y’urubyiruko iracyari mike, dusaba ko hashyirwaho uburyo bwihariye imishinga y’urubyiruko igitangira kandi ifite udushya igahabwa umwihariko mu gutanga inguzanyo zishingiwe ku ngwate .”
Umuyobozi Mukuru w’Ikigega gishinzwe guteza imbere imishinga mito n’iciriritse BDF, Vincent Munyeshyaka yavuze ko hari ibyiciro byihariye birimo n’urubyiruko bifashwa kubona inguzanyo zibafasha gushyira mu bikorwa imishinga yabo mu gihe badafite ingwate zakwa mu mabanki .
Yagize ati: “Ku bantu basaba inguzanyo ariko bafite ikibazo cyo kubura imitungo batanga, kugira ngo amabanki yizere ko bazabasha kwishyura, muri 2023 politike twarayivuguruye, ubu dushoramo miriyari 16 buri mwaka ariko turabona twakomeza n’ubukangurambaga ku buryo iyi serivisi yakomeza kwitabirwa kurusha uko bimeze uyu munsi .”
Munyeshyaka akomeza agira ati: ” Urubyiruko be gucika intege birarusaba gutera intambwe, abasaba amafaranga bakagira imishinga imeze neza, dufite na serivisi zibafasha gutegura iyo mishinga, birasaba ko twese twakora neza kandi buri ruhande rugakora inshingano zarwo.”
Ba rwiyemezamirimo iyo imishinga yabo yatoranyijwe boroherezwa kubona ingwate kandi bagahabwa inyunganizi ya Leta iri hagati ya 50 % na 75%. Ubu inguzanyo ihabwa urubyiruko binyujijwe muri BDF ingana na 18% by’inguzanyo yose itangwa n’amabanki.
