Ikipe ya APR FC yaguye miswi na Kiyovu Sports igitego 1-1, mu mukino ubanza wa ½ cy’irangiza w’Igikombe cy’Amahoro amakipe yombi yari yahuriyemo kuri uyu wa Gatatu.
APR FC yari yakiriye Rayon Sports mu mukino w’agapingane wabereye kuri Stade ya Bugesera.
Ni umukino watangiranye no gusatirana ku mpande zombi, bisaba umunota wa 23 w’umukino ngo Ikipe y’Ingabo z’Igihugu ifungure amazamu biciye kuri Kwitonda Alain ‘Bacca’.
Hari ku mupira wari utakajwe na Nshimirimana Ismael ‘Pitchou’, mbere y’uko Nshuti Innocent ahita awuha Bacca wahise awutera mu nguni y’izamu rya Yves Kimenyi.
Iminota yakurikiyeho muri rusange yaranzwe n’igitutu cya Kiyovu Sports yashakaga kugombora; gusa igice cya mbere cy’umukino kirangira itabyaje umusaruro koruneri nyinshi yagiye ibona.
Igice cya kabiri cy’umukino cyaranzwe nanone no gusatirana ku mpande zombi; bijyanye no kuba APR FC yashakaga igitego cya kabiri cy’umutekano na ho Kiyovu Sports igashaka icyo kugombora.
Iyi kipe yo ku Mumena yashoboye kwishyura ku munota wa 74 ibifashijwemo na Floduard Mugiraneza.
Ni igitego uyu musore ukina hagati mu kibuga yatsindiye mu Kavuyo, nyuma y’uko ba myugariro ba APR FC bari bananiwe gukura imbere y’izamu umupira wari uhahinduwe na Serumogo Ali Omar.
Kiyovu Sports yishyuye nyuma y’amasegonda make APR FC iteye umutambiko w’izamu Nshimiyimana Yunusu yateye nyuma ya Coup-Franc yari itewe na mukuru we Ombolenga Fitina.
Ku munota wa 90 w’umukino APR FC yatsinze igitego cya kabiri cya Bacca watereye ishoti riremereye inyuma gato y’urubuga rw’amahina; gusa umusifuzi wo ku ruhande ahitamo kucyanga nyuma yo kwemeza ko hari umwe mu bakinnyi b’iriya kipe wari waraririye.
Ni icyemezo cyarakaje cyane abakinnyi n’abatoza ba APR FC biba ngombwa ko bashwana cyane n’abasifizi.
Rayon Sports yakoreye amahindura kuri Mukura VS
Kuri Stade Mpuzamahanga ya Huye ho haberaga umukino ubanza wa ½ cy’Irangiza Mukura VS yari yakiriyemo Rayon Sports.
Ni umukino ikipe y’umutoza Haringingo Francis isa n’iyakoreyemo ibitangaza; iwurangiza itsinze ibitego 3-2.
Mukura VS yari yatangije igice cya mbere iri imbere n’ibitego 2-0 yari yatsindiwe na Kamanzi Achraf cyo kimwe na Robert Mukhogotya; mbere y’uko Rayon Sports ibigombora mu gice cya kabiri ikanatsinda icy’intsinzi.
Héritier Luvumbu ni we wagaruye iyi kipe mu mukino ubwo yayitsindiraga igitego cya mbere ku munota wa 47; Joackiam Ojera ayitsindira icya kabiri ku wa 80 mbere y’uko Onana atsinda icy’intsinzi ku munota wa 90+2.
