Rutahizamu Mariano Diaz ukinira ikipe ya Real Madrid yo muri Espagne, yagaragayeho icyorezo cya Covid-19, bituma icyoba cy’uko muri Real Madrid hashobora kugaragara abandi bakinnyi banduye iki cyorezo kiba kinshi.
Ku wa mbere tariki ya 27 Nyakanga ni bwo abakinnyi ba Real Madrid bapimwe icyorezo cya Covid-19, ibisubizo bigaragaza ko Mariano Diaz yacyanduye.
Iyi kipe y’i Madrid yavuze ko uyu rutahizamu ukiri muto ukomoka muri Dominican Republic nyuma yo kwandura iki cyorezo ameze neza, akaba ari mu kato iwe mu rugo.
Itangazo Real Madrid yasohoye riragira riti: “Nyuma y’igikorwa cyo gupima Covid-19 cyakorewe buri muntu ku giti cye mu kipe ya mbere ejo hashize gikozwe n’abanganga ba Real Madrid, umukinnyi wacu Mariano yaranduye. Umukinnyi afite ubuzima bwiza kandi arubahiriza ingamba z’isuku mu rugo.”
Mariano Diaz yagaragayeho icyorezo cya Covid-19, mu gihe ikipe ye ya Real Madrid yitegura guhura na Manchester City yo mu Bwongereza, mu mukino wo kwishyura wa UEFA Champions League uzabera ku kibuga El Etihad.
Ni nyuma y’uko umukino ubanza wabereye i Santiago Bernabeu ku kibuga cya Real Madrid warangiye Man City itsinze Real Madrid ibitego 2-1.
Magingo aya hari impungenge z’uko Mariano ashobora kuba yaranduje bamwe muri bagenzi be, ibishobora gutuma Real Madrid ibura bamwe mu bakinnyi bayo kuri uriya mukino isabwa gutsinda kugira ngo igere muri 1/4 cy’irangiza mu irushanwa rya Champions League.
