Kuri uyu wa Kane, itariki ya 27 Ugushyingo, Igisirikare cy’u Burundi (FDNB) cyasohoye itangazo, gisobanura aho gihagaze ku kibazo cy’ibibera i Minembwe, muri Kivu y’Amajyepfo, aho gihakana cyivuye inyuma ibirego bikwirakwizwa ku mbuga nkoranyambaga ko cyashyize mu bwigunge abaturage b’abasivili b’Abanyamulenge.
Mu itangazo ryabwo, Ubuyobozi Bukuru bw’Ingabo bwemeza ko “muri iki gihe nta basirikare ba FDNB bari mu gace ka Minembwe.” Iki gisirikare kivuga ko gishaka gusubiza “amagambo n’ibitekerezo bitandukanye” binenga imikorere yacyo muri Kivu y’Amajyepfo, aho imitwe y’Ingabo z’u Burundi igira uruhare mu kurwanya imitwe yitwaje intwaro.
Mu gihe FDNB ihakana ko ifite ingabo muri Minembwe, yanatunze urutoki ihuriro ry’imitwe yitwaje intwaro, irimo Red Tabara, FNL Nzabampema, Twirwaneho, AFC/M23, n’indi, ishinja kwigarurira Minembwe no “gufata bugwate abaturage b’abasivili.”
Nk’uko Igisirikare cy’u Burundi kibitangaza, ngo iyo mitwe ikoresha abasivili nk ‘“ingabo zo kwikingira” mu gihe cyo kugaba ibitero ku birindiro bya FARDC cyangwa n’ingabo zayo ubwayo ziherereye muri ako karere. FDNB yizera ko abasivili, “bafashwe bugwate,” badatinyuka gutangaza ibyo bikorwa “kubera gutinya kwicwa bunyamaswa,”.
Igisirikare cy’u Burundi cyakomoje ku mashusho yashyizwe ahagaragara na Rafiki Bora TV, agaragaramo Maître Maniragaba, nk’umuyobozi w’ishuri i Minembwe. Nk’uko itangazo rya FDNB ribivuga, aya mashusho “yerekana bihagije ko ihuriro ryavuzwe haruguru ribana n’abaturage b’abasivili” kandi rikerekana “ubufatanye bwa hafi” hagati y’umuntu wafashe amashusho n’abarwanyi, bafatwa amashusho nta bwoba. Igisirikare cy’u Burundi cyanzuye ko “nta tandukaniro riri hagati y’abasivili n’abarwanyi.”
Imisozi miremire ya Kivu y’Amajyepfo ikomeje kuba kamwe mu turere turangwamo intambara mu burasirazuba bwa DRC, irangwamo imitwe myinshi yitwaje intwaro, hakaba hakomeje kugaragara umwuka mubi hagati y’abaturage. Ni muri urwo rwego, bigoye cyane cyane ko indorerezi zigenga zigenzura mu bwigenge amakuru aturuka muri iki gice avugwa n’impande zitandukanye.
