Leta y’u Bufaransa ibisabwe na Minisiteri y’ingabo z’icyo gihugu, yemeje ko imihanda n’insisiro bigera ku ijana mu Bufaransa bigiye guhabwa amazina y’abasirikare bakomoka muri Afurika, barwanye ku ruhande rwabwo mu ntambara ya Kabiri y’Isi.
Hagendewe ku busabe bw’abamaze iminsi bigaragambya mu cyiswe Black Lives Matter, bagiye bavuga ko Leta y’u Bufaransa ntacyo yakoreye Abanyafurika barwanye ku ruhande rwayo mu Ntambara ya Kabiri y’Isi. Leta y’u Bufaransa yatangije igikorwa cyo kwitirira imihanda n’insisiro amazina ya bamwe mu barwabyi bakomoka muri Afurika.
Ibiro Ntaramakuru by’Abafaransa AFP, bikomeza bivuga ko ku rutonde rw’abasikari 100 rwatanzwe na Minisiteri y’Ingabo z’ubufaransa, higanjemo amazina y’abasirikare bakomoka muri Senegal no mu bindi bihugu byo mu majyaruguru y’Afurika.
Abanyafurika bagize uruhare mu kubohoza u Bufaransa bwari busumbirijwe n’Abadage mu ntambara yakabiri y’Isi, mu mwaka 1944.
Minisitiri w’Ingabo z’u Bufaransa, Geneviève Darrieussecq, mu nyandiko yasohoye igizwe n’impapuro 210, ikubiyemo amazina n’amafoto y’abasirikare bose barwanye ku ruhande rw’ubufaransa yagarutse ku butwari bwaranze izo ngabo, aho yavuzeko iyo hatabamo ubwitange no kumena amaraso kwazo, u Bufaransa bwigenga uyu munsi buba bwaraburiwe irengero.
Mu mpera za Kamena ni bwo ikibumbe cy’umutware w’u Bufaransa, Jean-Baptiste Colbert, ufatwa nk’uwazanye igitekerezo cy’ubukoloni cyamenaguwe n’abigaragambya mu cyiswe Black Lives Matter. Ni imyigaragambyo yafashe intera mu bice byinshi by’u Burayi na Leta Zunze Ubumwe z’Amerika.
Inshingano zo gushaka imihanda y’itirirwa Abanyafurika bitange u Bufaransa yahawe abayobozi b’imigi mu Bufaransa. Ni igikorwa cyatangiye muri Mutarama uyu mwaka, aho mu Mu burasirazuba bw’umugi wa Bandol, urusisiro rwaho rwiswe African Liberators Square.
