Iyo amasaha 24 ashize nibyo twita umunsi, iyo byisubiyemo inshuro 7 bibyara iminsi 7 tukabyita icyumweru. Buri munsi ugira izina ryawo bitandukanye n’undi munsi aho mu guhitamo ayo mazina hagendewe ku bigirwamana byasengwaga icyo gihe.
Dore uko amazina y’iminsi y’icyumweru yaturutse ku bigirwamana, amateka yabyo, n’uko bihangana n’imyizerere y’Abakirisitu:
1. Ku wa Mbere (Monday / Lundi)
Uyu munsi ukomoka ku kwezi (Moon), kwafatwaga nk’ikigirwamana gikomeye mu mico ya kera y’Abaroma, Abanyababiloni, n’Abanyamisiri. Ukwezi kwafatwaga nk’umugenga w’umwijima n’ubuzima bwa nijoro.
Kwitirira umunsi ukwezi byashimangaga imyemerere ishingiye ku buhanuzi bw’ukwezi n’imihango ishingiye ku mbaraga za kamere byabangikanywaga n’Imana imwe rukumbi Abakirisitu bemera.
Iyi migenzo y’ibanze ku kwezi yahindutse ishingiro ry’imyemerere ya gisatanisiti no kwihangira ibitekerezo bitandukanya abantu n’Imana, nko kwizera astrologi (ibijyanye n’ibimenyetso by’inyenyeri). Hari Abakirisitu benshi bagwa muri ibi byaha byo gushingira ubuzima ku bimenyetso by’ukwezi cyangwa inyenyeri aho kwizera Imana.
Abantu bishingikiriza horoscopes aho kubaha Imana nk’umuyobozi wa buri kintu (Yesaya 47:13-14) “Inama zawe nyinshi zirakuruhije, abaraguza ijuru n’abaraguza inyenyeri n’abahanura ukwezi kubonetse bakavuga ibizaba, nibahaguruke bagukize ibizakuzaho. Dore bazamera nk’ibishingwe umuriro ubatwike, ntibazikiza imbaraga z’ibirimi byawo. Uwo muriro ntuzaba amakara yo kotwa, cyangwa icyotero cyo kwicarwa iruhande.”
2. Ku wa Kabiri (Tuesday / Mardi)
Ukomoka kuri Mars (Tiw mu Baviyikingi) ikigirwamana cy’intambara n’imbaraga. Abaroma basengaga Mars nk’umurinzi w’igihugu kandi bamuhaga icyubahiro cyihariye mu rwego rwo kurwanya abanzi.
Mars yagaragaraga nk’ikigirwamana gikomeye cyigisha intambara n’ubugome mu gihe Abakirisitu bigishaga amahoro n’urukundo nk’iby’ingenzi mu mibereho myiza.
Mars nk’ikigirwamana cy’intambara ishimangira imbaraga zishingiye ku bugome, intambara, no gukoresha imbaraga aho kubaha Imana. Muri iki gihe, abantu benshi bahindura ubukirisitu intwaro yo kwihimura aho gukurikiza urugero rwa Kristo wababariye.
Hari abashakira ubutabera mu mirwano cyangwa ubwihisho bw’imbaraga z’isi, kandi Bibiliya yigisha amahoro: (Matayo 5:9 “Hahirwa abakiranura, Kuko ari bo bazitwa abana b’Imana”.
3. Ku wa Gatatu (Wednesday / Mercredi)
Ukomoka kuri Mercure (Woden mu Baviyikingi) ikigirwamana cy’ubutumwa, ubucuruzi, n’ubuhanga. Mu mico ya kera, Mercure yari umuhuza w’imana n’abantu, kandi abacuruzi bamuhungiragaho.
Kwizera Mercure byashyigikiraga ibitekerezo byo kwiyambaza ibigirwamana nk’abahuza n’imana, bitesha agaciro umwanya wa Yesu Kristo nk’Umuhuza umwe rukumbi nk’uko Abakirisitu babyemera: 1 Timoteyo 2:5 “Kuko hariho Imana imwe, kandi hariho Umuhuza umwe w’Imana n’abantu, na we ni umuntu, ari we Yesu Kristo”
Mercure, ikigirwamana cy’ubucuruzi n’ubutunzi, ishimangira ishyaka ryo gukunda ibintu by’isi birengeje urugero. Muri iki gihe, abantu benshi basimbuza Imana ubutunzi, bakibanda ku gushaka ubukire aho gushaka ubwami bw’Imana.
Bibiliya ivuga ko “Kuko gukunda impiya ari umuzi w’ibibi byose, hariho abantu bamwe bazirarikiye barayoba, bava mu byo kwizera bihandisha imibabaro myinshi.” (1 Timoteyo 6:10) kandi Abakirisitu benshi bakorwa n’uburiganya bwa Mercure binyuze mu rusaku rw’ubucuruzi no kwishyira hejuru.
4. Ku wa Kane (Thursday / Jeudi)
Ukomoka kuri Jupiter (Thor mu Baviyikingi) umwami w’imana zose, wategekaga imirabyo n’ikirere. Mu Baroma, Jupiter yahabwaga icyubahiro nk’Imana isumba izindi zose.
Jupiter yashyirwaga hejuru nk’ikigirwamana cy’ububasha bwose bihabanye n’ukwemera kw’Abakirisitu ko Imana imwe rukumbi ari yo ifite ububasha bwose mu ijuru no ku isi.
Jupiter yamezaga ibitekerezo by’ubwibone no gushaka kuganza abandi. Muri iki gihe, Jupiter yigaragariza mu myemerere ishyigikira ubwibone, ubwirasi, n’ubutegetsi butagira urukundo. Abantu benshi, harimo n’Abakirisitu bagwa muri uyu mutego wo kwishyira hejuru, kwirata no guha agaciro ibyo bigirwamana aho kumvira Imana.
Bibiliya ivuga ko “Mwicishe bugufi imbere y’Umwami Imana kuko ari bwo izabashyira hejuru.” (Yakobo 4:10), ariko Jupiter ishyigikira ibitekerezo bihabanye n’aya mahame.
5. Ku wa Gatanu (Friday / Vendredi)
Ukomoka kuri Venus (Freya cyangwa Frigg mu Baviyikingi), ikigirwamana cy’urukundo, uburanga, n’umunezero. Venus yasengwaga cyane mu migenzo ijyanye n’urukundo n’uburaya.
Imigenzo ya Venus yatsindagiraga ibyaha by’urukozasoni n’imyifato y’ubusambanyi, bikaba bihabanye cyane n’amahame y’Abakirisitu y’isuku yo mu mutima no mu mubiri.
Venus, ikigirwamana cy’ubusambanyi, gishimangira imico y’ubwiyandarike bw’imyitwarire, cyane cyane mu rwego rw’urukundo n’ibishamikiyeho. Muri iki gihe turimo, Venus yigaragariza mu rugero rw’imbuga nkoranyambaga, ibinyamakuru, n’imyidagaduro ishyigikira ubusambanyi n’ubusabane bushingiye ku marangamutima aho guha agaciro umuryango nk’uko Imana ibishaka.
Bibiliya ivuga ko “Muzibukire gusambana. Ibindi byaha byose umuntu akora bikorerwa inyuma y’umubiri, ariko usambana aba akoze icyaha cyo mu mubiri we.” (1 Abakorinto 6:18), ariko Venus ishimangira ko kubaho mu bwiyandarike ari ibintu bisanzwe cyangwa byemewe.
6. Ku wa Gatandatu (Saturday / Samedi)
Ukomoka kuri Saturn, ikigirwamana cy’uburumbuke n’ubuhinzi. Mu migenzo ya kera, Abaroma bahimbazaga Saturnalia, ibirori by’imyidagaduro n’ubusinzi byabaga buri mwaka.
Ibirori bya Saturnalia byahindutse ikintu cyibasira imyitwarire y’Abakirisitu kuko byashingiraga ku kwinezeza birengeje urugero bihabanye n’imyitwarire yicisha bugufi Abakirisitu bigishaga.
Saturn yashyigikiraga ibirori n’ubusinzi kandi muri iki gihe abakirisitu benshi barariganywa binyuze mu kwinezeza no kwibanda ku burumbuke bw’isi aho gushaka iby’Imana. Imyidagaduro y’ikirenga yo ku wa Gatandatu ishishikariza kuruhuka cyangwa kwinezeza mu buryo burengeje urugero bikaba intambamyi yo gusenga Imana no kwibuka gukora umurimo wayo.
Bibiliya ivuga ko gusinda no kwinezeza cyane ari umurimo w’umwijima (Abagalatiya 5:19-21).
7. Ku Cyumweru (Sunday / Dimanche)
Ukomoka ku zuba (Sun), ryafatwaga nk’ikigirwamana mu mico myinshi nka Misiri n’Abaroma. Ibirori byo gusenga izuba byari umuco ukomeye cyane, cyane cyane ku Baroma basengaga Apollo.
Gusenga izuba byashyiraga izuba mu mwanya w’Imana, bigatuma imyemerere ya gikirisitu y’Imana imwe rukumbi irwanywa. Icyakora, Abakirisitu baje guhindura umunsi wo ku Cyumweru uba uwo gusenga Imana imwe rukumbi no kwibuka izuka rya Yesu Kristo.
Gusenga izuba, bigaragazwa n’umuco wo kwizera ibyaremwe aho kwizera Umuremyi, riracyarwanya imyemerere y’Abakirisitu. Muri iki gihe, abantu benshi bigira abagaragu b’ibiremwa (nk’ikirere, izuba, cyangwa isi) aho gusenga Imana yaremye ibyo byose. Hari n’abagarukira kwibanda ku buruhukiro n’ibyishimo byo ku isi ku Cyumweru aho kuruhukira muri Nyagasani
Amazina y’iminsi ashingiye ku bigirwamana aracyakora muri iki gihe, kuko imyemerere y’ibigirwamana yihinduye isura, ikagaragarira mu myidagaduro, ubukungu, imyitwarire, n’imyemerere yo kwizera ibintu byaremwe aho kwizera Imana y’ukuri. Abakirisitu bakwiye kuba maso, bakirinda kugwa muri iyo mitego binyuze mu kumenya ukuri kw’Ijambo ry’Imana (Yohana 8:32) no kuyoborwa na Mwuka Wera kuko ari We ushobora kubarinda ibinyoma by’isi.
