Amakuru aturuka muri Teritwari ya Fizi ho mu ntara ya Kivu y’Amajyepfo, aravuga ko ba Jenerali 2 bo mu mitwe ya Wazalendo bapfuye nyuma y’imirwano yatewe no gusubiranamo kw’iriya mitwe.
Ni imirwano yasakiranyije imitwe ibiri ya Maï-Maï, irimo uwa Maï-Maï Yakutumba wa Hamuli William Yakutumba.
Mu baguye muri iyi mirwano yabereye ahitwa Lutete, harimo Gen. Trésor Kibukila wari uzwi nka Mutetezi ndetse n’undi wari uzwi nka Feu-rouge.
Bivugwa ko Mutetezi yishwe n’inyeshyamba za Maï-Maï Yakutumba zari ziturutse mu ntara ya Maniema zerekeza mu mujyi wa Uvira, aho zari zigiye gufasha indi mitwe ya Maï-Maï kuwurinda ngo utigarurirwa na M23.
Mu majwi y’uwari uyoboye ziriya nyeshyamba witwa Brown yagiye hanze, yumvikana avuga ko we na bagenzi be babanje gutegwa igico n’abarwanyi ba Mutetezi; n’ubwo andi makuru avuga ko intandaro y’imirwano yabaye bariyeri inyeshyamba za Mutetezi zateze iza Brown.
Mutetezi yishwe kandi mu gihe yari amaze iminsi ashinjwa kugira uruhare mu ifatwa ry’uduce dutandukanye tw’Intara ya Kivu y’Amajyepfo tumaze iminsi twigarurirwa na M23.
Uyu yashinjwaga kuba yari afite gahunda yo kwiyunga kuri ziriya nyeshyamba za Gen Sultani Makenga, n’ubwo uruhande rwe rubihakana.
Uyu kandi yari azwiho kuba yarakunze gutoteza no gukorera ubwicanyi abanye-Congo bo mu bwoko bw’Abanyamulenge batuye mu misozi miremire ya Itombwe, abita “abanyamahanga b’Abanyarwanda.”
