Imirwano hagati ya Gen. Khalifa Haftar na Leta ya Libya yemewe n’Umuryango Mpuzamahanga (GNA) yarubuye mu minsi ibiri ishize mu gace ka Tarhouna mu bilometero 88 uvuye mu majyepfo y’Umujyi wa Tripoli. Imirwano yatangiye kuwa Gatandatu tariki 18 Mata ubwo Ingabo za Leta zagabaga igitero zigamije kwisubiza Umujyi wa Tarhouna wari mu maboko y’abarwanyi ba Gen. Haftar biyise Libya National Army (LNA). The New Araba dukesha iyi nkuru itangaza ko ingabo za Leta zahitanye abarwanyi umunani bo ku ruhande rwa Gen. Haftar ndetse abagera ku 102 bafatwa mpiri (rwa mikono). Umuvugizi w’Ingabo za Leta yemewe, Mohammed Qununu atangaza ko bafashe agace ka Hawatem kari muri Tarhouna. Uyu yavuze ko ” Ibitero by’indege byashegeshe bikomeye ibirindiro bitanu mbere y’uko ingabo zo ku butaka zitangira kugaba ibitero muri uwo mujyi.” Tarhouna ni agace kari kamaze igihe mu maboko ya Gen. Haftar. Ni agace katumaga Gen. Haftar abasha kugaba ibitero mu Mujyi wa Tripoli ngo awigarurire kuva muri Mata 2019. Ni bimwe mu birindiro bikomeye LNA itakaje nyuma yo gukurwa mu bindi by’inegnzi birirmo: Sabratha, Surman and al-Ajaylat nk’uko Aljazeera ibitangaza. Ingabo za GNA zari zimaze igihe zigarurira ibindi bice biri mu majyepfo ya Tripoli. Ni agace kari karafashwe nyuma y’ibitero bya Gen. Haftar byamishe ibisasu muri ako gace. Ingabo za GNA zubuye imirwano mu kwezi gushize nyuma y’aho agahange ko guhhagarika imirwano kabaye imfabusa. Mu gihe Isi ihanganye na Coronavirus, impande zihanganye zanze kumva ubusabe bwa LONI bwo guhagarika imirwano. Kuri ubu, ibihugu birimo: Ubutaliyani, Turukiya na Qatar bishyigiye GNA iyobowe na Fayaz Al- Sarraj mu gihe ibirimo: Uburusiya, Ubufaransa, Misiri, Sudani, Leta Zunze Ubumwe z’Abarabu na Arabia Saudite bashyigikiye LNA ya Gen. Khalifa Haftar.
Imirwano yubuye hagati ya Gen. Haftar na Leta ya Libya
Sangiza iyi nkuru
Soma Izindi Nkuru
