Ikipe ya Arsenal iri mu bihe byiza cyane muri shampiyona y’u Bwongereza ya Premier League 2025/2026, aho iyoboye urutonde n’amanota atandatu irusha Manchester City, bituma benshi bayibona nk’ikipe ishobora gutwara igikombe bwa mbere kuva mu 2004. Gusa, n’ubwo icyizere kiri hejuru, haracyari impamvu zitandukanye zishobora gutuma inzozi za Arsenal zongeye gusenyuka.
Kugeza ubu, Arsenal imaze gutsindwa imikino itatu gusa mu mikino 25 imaze gukina, ikagira ubwirinzi bukomeye cyane. Nubwo bimeze bityo, abasesenguzi bamwe bagaragaza ko urugendo rugana ku gikombe rukiri rurerure, cyane ko hasigaye imikino 13 ishobora guhindura byinshi.
1. Imikino isigaye ikomeye kurusha iya Manchester City
Ku mpapuro, imikino Arsenal isigaje iragoye kurusha iya Manchester City. Ikipe ya Mikel Arteta iracyafite imikino ikomeye irimo gusura Tottenham, kwakira Chelsea, ndetse no kuzajya gukina na Manchester City iwabo. Ku rundi ruhande, City isa n’iyarangije guhura n’amakipe menshi akomeye.
Umutoza wa City, Pep Guardiola, yibukije ko imikino 13 isigaye ari myinshi, ati: “Hari byinshi bishobora kuba. Dufite Arsenal iwacu, kandi tugomba kubatsinda. Mu bunararibonye bwanjye, imikino 13 ni igihe gihagije cyo guhindura ibintu.”
2. Amayeri ya Mikel Arteta
Arteta yashimwe cyane ku buryo yubatse Arsenal ishingiye ku bwirinzi bukomeye. Gusa bamwe bamunenga ko mu mikino ikomeye, akenshi ahitamo kunganya aho gushaka intsinzi. Iyo mikorere ishobora gutuma atakaza amahirwe yo gushyiraho ikimenyetso gikomeye ku bahanganye na we.
Abakunzi b’umupira w’amaguru bazaba bategereje kureba uko azitwara mu mukino azahuramo na Manchester City mu kwezi kwa Mata, kuko uwo mukino ushobora kugira uruhare runini ku cyerekezo cy’igikombe.
3. Uburambe n’imitekerereze
Mu myaka itatu ishize, Arsenal yagiye iba mu mwanya mwiza ariko ikarangiza ku mwanya wa kabiri. Mu bakinnyi b’ubu, Gabriel Jesus ni we wenyine wigeze gutwara Premier League, mu gihe abandi nka Kai Havertz na Kepa Arrizabalaga bafite uburambe ku bikombe bikomeye ariko bitari byinshi.
Hari n’abavuga ko kapiteni Martin Ødegaard ataragaragaza ubuyobozi buhagije mu bihe bikomeye, ibintu bishobora kongera gutuma Arsenal itakaza icyizere mu gihe yagira umukino mubi mu mikino ya nyuma.
4. Kwishingikiriza ku bakinnyi bake
Nubwo Arsenal yakoze ishoramari rikomeye mu isoko ry’igura n’igurisha ry’abakinnyi, iracyishingikiriza cyane ku bakinnyi nka Declan Rice, William Saliba, na Gabriel Magalhães. By’umwihariko, Rice ni inkingi ya mwamba mu kibuga hagati.
N’ubwo izo mbogamizi zose zihari, si ukuvuga ko Arsenal itazatwara igikombe. Ubusesenguzi bwa mudasobwa ya Opta bwerekana ko Arsenal ifite amahirwe arenga 90% yo gutwara Premier League, mu gihe Manchester City ari yo iyikurikiye hafi.
Icyemezo cya nyuma kizafatwa mu kibuga, mu mikino isigaye, aho hazagaragara niba Arsenal izatsinda igitutu ikarangiza inzara y’imyaka irenga 20 idatwara igikombe cya shampiyona, cyangwa niba Manchester City izongera gukora ibidasanzwe nk’uko yabiyimenyereje.
