Ibihe by’ikirere bihinduka, kandi uko ikirere gihinduka, ni nako imyambarire y’abantu nayo ihinduka. Mu gihe cy’ubushyuhe (impeshyi) abantu bakambara imyenda yoroshye, mu gihe cy’ubukonje bakambara imyenda ibafasha kwirinda imbeho. Ubu mu Rwanda hari ubukonje n’imvura, bityo abantu basabwa guhindura imyambarire kugira ngo birinde imbeho.
Zimwe mu nama zitangwa ku myambarire mu bihe by’ubukonje.
1. Imyenda yoroshye ntabwo ari iy’ibihe bikonje: Urubuga rwa InStyle UK Magazine rusobanura ko imyenda yoroshye nk’imyambaro yo mu mpeshyi itari iy’ibihe bikonje kuko itarinda umuntu imbeho. Mu bihe by’ubukonje, abantu bakenera imyenda ibafasha gukumira imbeho.
2. Inkweto zifite ubwoya cyangwa amakoti ashyuhirana cyane si ngombwa: Benshi bisanga bashaka kwambara amakoti ashyuhirana cyangwa inkweto zifite ubwoya ngo bashyuhe. Ariko mu Rwanda, aho ubukonje butari bwinshi nk’ubwo mu Burayi, ntibikenewe. Ahubwo, ibyiza ni ugukoresha ikoti ritaremereye cyangwa umupira w’imbeho usanzwe.
3. Inkweto zifunze ni ngombwa: Sandali n’izindi nkweto zifunguye ntabwo ari izo kwambara mu bukonje. Ni byiza kwambara inkweto zifunze ibirenge mu kwirinda imbeho, kandi zikaba zijyanye n’imyambaro wambaye.
4. Amakoti ataremereye: Iyo ikirere kidahise kigaragaza imvura, ni byiza kwambara amakoti ataremereye cyane ariko afasha mu gushyushya umubiri, kugira ngo wirinde imbeho.
5. Imyenda miremire ku bagore/bakobwa: Ku bagore, bagirwa inama yo kwambara imyenda miremire ibafubika amaguru. Amakanzu, amajipo cyangwa amapantalo maremare ni byo byiza mu bihe by’ubukonje. Iyo myenda niyo ifasha mu gukumira imbeho kandi biroroshye kuyibona ku isoko.
Izi nama zose zitangwa kugira ngo abantu bamenye neza imyambarire ikwiye mu bihe by’ubukonje, bityo bakirinda imbeho kandi bagume mu buzima bwiza.
