Indege z’intambara ni ikintu cy’ingenzi ku gisirikare cyose cyo mu kirere kandi ingero za F-35 Lightning II na F-22 Raptor zigaragaza ubuhangange bwazo. Urubuga Airforce-technology rurasesengura indege icumi za mbere z’indwanyi ku Isi, rushingiye ku mwihariko wazo, ikoranabuhanga rizigize, intwaro zikoresha ndetse n’imikorere yazo.
Lockheed Martin F-35 Lightning II
F-35 Lighting II ni yo ndege y’intambara mpuzamahanga yo ku rwego rwa generation ya 5 gatanu (5 G) ku Isi. Irihuta bikabije kandi ikagira ikoranabuhanga rituma itagaragara kuri radar, kongeraho ibikoresho bya sensor hamwe n’imbunda za kijyambere, bituma F-35 ari yo ndege ya mbere y’indwanyi kurenza izindi ndege zose z’intambara.
Lockheed Martin ni we mushoramari wa mbere wa F-35 mu gihe abafatanyabikorwa bayo bakomeye barimo Northrop Grumman, BAE Systems na Pratt & Whitney.
F-35 yakoze urugendo rwayo rwa mbere mu Kuboza 2006. Ibintu bitatu yihariye birimo guhaguruka no kugwa bisanzwe (CTOL), guhagurukira mu ntera ngufi no kugwa ituruka hejuru imanuka hasi nk’uko wajugunya ikintu mu kirere kikagaruka bitandukanye n’uko izindi ndege zigwa (STOVL) hamwe no gutwara ibintu (CV), bisimbura A-10 na F-16 z’ingabo z’Amerika zirwanira mu kirere, F / A-18 y’ingabo z’Amerika zirwanira mu mazi, F / A-18 na AV-8B Harrier y’ingabo z’Amerika zirwanira ku butaka n’indege z’indwanyi zitandukanye zo mu bindi bihugu bifatanya.
Lockheed Martin / Boeing F-22 Raptor
F-22 Raptor yakozwe na Lockheed Martin ifatanyije na Boeing nayo igira intebe imwe, moteri z’impanga zo mu gisekuru cya gatanu (5 G) nayo ni indege iteye imbere mu bijyanye n’intambara. Kimwe n’iyo twahereyeho, iyi nayo ifite ikoranabuhanga ryo kutagaragara kuri radar ndetse n’imikorere ituma kuyikoresha byoroha cyane (super-manoeuvrable).
F-22 y’Igisirikare cyo mu kirere cya Leta Zunze Ubumwe za Amerika na yo ifatwa nk’igihangange mu ntambara zo mu kirere.
Iyi yagurukijwe bwa mbere muri Nzeri 1997. Indege za mbere z’ubu bwoko zahawe ibirindiro by’ingabo zo mu kirere bya Nellis muri Mutarama 2003. Yatangiye gukoreshwa ku mugaragaro mu Ukuboza 2005. Indege imwe igura miliyoni 339 z’Amadolari.
F-22 Raptor ikoresha misile zikomeye zo mu kirere no mu kirere ndetse no mu kirere no ku butaka. Ikoranabuhanga rigenda riza rishyirwa mu ndege ya F-22 rituma iba igikoresho cyiza mu butumwa butandukanye, burimo nko gutata, gushakisha, kugaba ibitero, intambara z’ikoranabuhanga n’ubundi.
Chengdu J-20
Chengdu J-20 nayo ni indege y’indwanyi yo mu gisekuru cya gatanu, y’intebe imwe, moteri y’impanga (twin engine), idapfa kubonwa na za radars, n’uruganda rukora rukora indege rwitwa ‘Chengdu Aircraft Industry Group (CAIG)’ ruyikoreye Igisirikare cyo mu kirere cy’u Bushinwa (People’s Liberation Army Air Force).
Iyi ndege itwara intwaro zayo imbere, ikaba ifite ahantu ishobora kubika uruvange rwa misile ziraswa mu ntera ndende n’iziraswa mu ntera ngufi mu kirere harimo nka PL-12C / D na PL-21. Yitwaza kandi misile ziraswa ku butaka, na misile zirwanya imirasire.
Iyi ndege yagiye mu kirere bwa mbere muri Mutarama 2011 imurikwa ku mugaragaro mu 2016. Yatangiye gukoreshwa n’Igisirikare cyo mu kirere cy’u Bushinwa (PLAAF) muri Werurwe 2017.
Sukhoi Su-57
Kimwe n’izindi ndege zabanje, Su-57 nayo ni indege y’indwanyi yo mu gisekuru cya gatanu, y’icyicaro kimwe, moteri ebyiri, yakozwe na United Aircraft Corporation. Yabanje kumenyekana nka PAK FA na T-50.
Indege yagenewe gukora ibirenze byose mu kirere no mu butumwa bwo gutera cyane cyane ikorewe ingabo zirwanira mu kirere z’u Burusiya n’izirwanira mu mazi. Ishobora kurinda ubwoko bwose bw’ibipimo byo ku butaka no mu kirere byibasiwe n’umwanzi kandi ikagenzura ikirere iri mu ntera ndende.
N’uburemere bwa toni10, iyi ndege ishobora gutwara misile z’ubwoko butandukanye nka X-31, X-35, X-38, X-58, X-59, ziraswa mu ntera ngufi no mu ntera iringaniye ziyobowe cyangwa zitayobowe ndetse na bombe zo mu kirere z’ibiro 250, 500, n’ibiro 1.500.
Iyi ndege yagiye mu kirere bwa mbere muri Mutarama 2010, byari biteganijwe ko izashyirwa ku mugaragaro n’igisirikare cyo mu kirere cy’u Burusiya mu 2019, igasimbura izindi ndege z’indwanyi zisanzwe zo mu bwoko bwa Su-27.
Eurofighter Typhoon
Eurofighter Typhoon ni indege z’indwanyi zigezweho zibarirwa muri zimwe za mbere ziteye imbere ku Isi. Zifite ikoranabuhanga ryo kwirinda misile rizwi nka Defence Aids Sub System (DASS) ndetse iakagira intwaro zitandukanye, nk’imbunda ya Mauser BK-27, ikagira za misile zikoreshwa mu kirere, mu kirere no ku butaka, n’izirasa amato.
Eurofighter Typhoon ikorwa n’inganda zishyize hamwe zo mu Burayi zikora ibikoresho bya gisirikare ziyobowe na Nato Eurofighter na Tornado Management Agency (NETMA), ikaba n’umukiriya wa mbere.
Ni Porogaramu itanga ikoranabuhanga rigezweho mu nganda z’ubwirinzi z’u Burayi.
Eurofighter Typhoon zagiye ku rugamba bwa mbere mu mwaka wa 2011 mu rwego rwo gushakisha amakuru no kugaba ibitero ku butaka muri Libya zoherejwe n’igisirikare cyo mu kirere cy’u Bwongereza (RAF) n’igisirikare cyo mu kirere cy’u Butaliyani.
Izindi
Sukhoi Su-35
Sukhoi Su-35 ni verisiyo yahinduwe cyane ya Su-27. Su-35 ni indege y’igisekuru cya kane (4 G) ariko ikoresha ikoresha ikoranabuhanga ryo mu gisekuru cya gatanu. Ikoranabuhanga rigezweho rituma irusha ubuhangange izindi ndege z’indwanyi zo mu gisekuru cya kane ubu nazo zirimo kuvugururwa hirya no hino ku Isi.
Boeing F/A-18E/F Super Hornet
Igisirikare cyo mu mazi cya Leta Zunze Ubumwe za Amerika cyatangiye gukoresha izi ndege mu 1999 mu rwego rwo gusimbura Grumman F-14 Tomcat. F / A-18F Super Hornet (verisiyo y’imyanya ibiri) yinjiye yatangiye gukoreshwa n’Igisirikare cyo mu Mazi cya Amerika (US Navy) ndetse n’igisirikare cyo mu kirere cya Australia (Royal Australian Air Force ) muri 2010.
Ubushobozi bwo kurwana bw’iyi ndege bwagaragaye mu gihe cya “Operation Iraqi Freedom”, “Operation Enduring Freedom” (Afghanistan), “Operation Southern Watch” (Irak) no mu Ntambara yo muri Afghanistan.
Dassault Rafale
Dassault Rafale ni indege z’intambara zikorwa na Dassault Aviation zifite moteri ebyiri ikaba ikora inshingano zitandukanye zirimo kurwana mu kirere, kugaba ibitero, gushakisha amakuru no kurasa ibisasu bya kirimbuzi.
Iyi ndege ikoreshwa n’igisirikare cyo mu kirere n’icyo mu mazi mu Bufaransa, nayo ikaba ari imwe mu ndege z’indwanyi zifite ikoranabuhanga rigezweho.
Iyi ndege yagiye ku rugamba bwa mbere mu 2002 mu gihe cya ‘Operation Enduring Freedom’ muri Irak, ndetse ikoreshwa mu mirwano itandukanye muri Afghanistan, Libya na Mali muri “Operation Serval”.
Boeing F-15E Strike Eagle
F-15E Strike Eagle yakozwe bivuye ku ndege za F-15A / D, F-15E ikaba ari inkingi ya mwamba y’igisirikare kirwanira mu kirere cya Leta Zunze Ubumwe za Amerika (USAF) muri iki gihe.
Izi ndege zo mu bwoko bwa F-15Es zakoreshejwe cyane n’igisirikare cyo mu kirere cya Amerika muri “Operations Desert Shield” na “Desert Storm” ndetse no muri “Operation Southern Watch” na “Northern Watch”. Ibindi bikorwa yoherejwemo ku rugamba kandi birimo “Operation Deny Flight” muri Bosnia na Herzogvina, “Operation Enduring Freedom”, “Operation Iraqi Freedom” na “Operation Odyssey Dawn” muri Libya.
Su-30MKI (Flanker-H)
Su-30MKI (Flanker-H) ni indege y’indwanyi y’imyanya ibiri y’abapilote, ikoreshwa n’Igisirikare cyo mu kirere cy’u Buhinde (IAF). Yakozwe n’uruganda rwa Sukhoi rwo mu Burusiya, ariko uruganda rwa Hindustan Aeronautics Limited rwo mu Buhinde (HAL) rufite uruhushya rwo kuziteranyiriza iwabo.
Ubwoko bwa mbere bwa Su-30MKI bwubatswe n’u Burusiya bwatangiye gukoreshwa bwa mbere n’Igisirikare cyo mu kirere cy’u Buhinde mu 2002, mu gihe indege ya mbere yateranyirijwe mu Buhinde yatangiye gukoresha na IAF mu 2004.
