Ku Cyumweru tariki ya 3 Kanama 2025, Ubushinwa n’Uburusiya batangije ku mugaragaro icyiciro cy’ibikorwa byo mu mazi by’imyitozo ya gisirikare bise Joint Sea-2025, bikaba biri kubera hafi y’Umujyi wa Vladivostok mu Burusiya.
Amato ya gisirikare y’impande zombi yavuye ku cyambu cya gisirikare mu gitondo kare, harimo ubwato butabara impanuka bwa Xihu bw’Abashinwa n’ubwa Igor Belousov bw’Uburusiya. Bukurikiwe n’ubwato butera ibisasu bwa Shaoxing na Urumqi (Ubushinwa), hamwe n’ubwato bunini bwo kurwanya za submarine bwa Admiral Tributs na koruvete Rezky (Burusiya).
Ibi bikorwa byatangijwe nyuma y’uko abayobozi b’ingabo z’ibihugu byombi bakoze imyitozo y’ibanze hashingiwe ku mashusho n’ibipimo byo mu nyanja. Ibi bigamije gutegura uko imbaraga z’impande zombi zizajya zikorana, by’umwihariko mu bikorwa byo kurwanya za submarine, ubwirinzi bw’indege n’ibisasu, n’ubutabazi bwo munsi y’amazi.
Iyi myitozo izamara iminsi itatu ikubiyemo ibice birimo: kurwanya za submarine, kurinda ikirere no kwirinda ibitero by’ibisasu, ndetse n’imyitozo ya gisirikare igamije kugerageza uko ubufatanye bwateguwe.
Umuvugizi w’Ingabo z’Ubushinwa, Colonel Zhang Xiaogang yavuze ko iyi myitozo ari igice cy’umugambi mpuzamahanga wa buri mwaka hagati y’ingabo z’Ubushinwa n’iz’Uburusiya.
