Umugabo wo muri Brazil yahuye n’akaga gakomeye ubwo inzoka yamurumaga ku gitsina ikanga kumurekura nk’uko bigaragara mashusho yo kuri murandasi akomeje gutangaza abantu benshi.
Uyu mugabo, wari uryamye hasi ababara cyane, yagaragaye mu mashusho yacicikanye ku mbuga nkoranyambaga mu gihe mugenzi we yamufataga amashusho ari kure. Undi muntu witanze yagerageje gukiza uyu mugabo akoresheje inkoni, ayinjiza mu kanwa k’inzoka agerageza kuyihambira kugira ngo irekure.
Icyakora, inzoka yangaga kurekura. Bakomeje kugerageza kuyitandukanya n’uwo mugabo bagerageza no kuyisukaho amazi, ariko byose byaranze.
Aya mashusho yafatiwe mu gace ka Pantanal muri Brazil yakwirakwijwe cyane kuri Instagram na TikTok, benshi bakayatangarira no kugira ubwoba.
Umunyamakuru w’inyamaswa uzwi nka Crocodile Cam kuri X yatangaje ko iyi nzoka yari King Cobra, imwe mu nzoka zifite ubumara bukaze cyane bushobora kwica umuntu mu gihe gito.
Ati: “Izi nzoka zigira ubumara bwibasira imyakura, bugatera umuntu kugira paralysis (uburwayi butuma umubiri udakora). Ubumara bwazo bushobora kwica abantu 20 bakuru cyangwa inzovu nkuru imwe. Buriya bumara bushobora no kwica umuntu mu minota 15 gusa.”
Nyuma y’igihe kinini, iyi nzoka yaje kurekura uwo mugabo, ahita ajyanwa kwa muganga igitaraganya kugira ngo avurwe.
Kugeza ubu, nta makuru yandi aratangazwa ku buzima bwe nyuma y’iki kibazo.
