Kuri uyu wa Gatatu, itariki 4 Werurwe, Ingabo zishinzwe Kurinda Impinduramatwara ya Kisilamu muri Iran (IRGC) zatangaje ko zasenye ubwato bw’intambara bw’Igisirikare cya Amerika bwo mu bwoko bwa “Destroyer”, hakoreshejwe misile za Qadr-380 na Talaieh.
Nk’uko Ibiro Ntaramakuru Tasnim bibitangaza, ngo Itangazo No 19 ry’igikorwa (operation) “Isezerano Ry’ukuri 4” ryagize riti: “Ingabo zirwanira mu mazi za IRGC zagabye igitero cya misile ku bipimo by’ingenzi by’Abanyamerika mu birometero birenga 600 mu nyanja y’u Buhinde……..”
Iri tangazo ryakomeje rigira riti: “Mu bikorwa bitandukanye byakozwe muri iki gikorwa gikomeye, Ingabo zirwanira mu mazi za IRGC zagabye igitero kuri destroyer y’Abanyamerika yari irimo kongera amavuta iyakura mu bwato bw’Abanyamerika mu birometero 600 uvuye ku nkombe za Iran mu Nyanja y’u Buhinde, hakoreshejwe misile Qadr-380 na Talaieh.”
Nk’uko amakuru y’ubutasi avuga, ngo umuriro mwinshi wadutse mu bwato bwombi watumye ikirere kijima hejuru y’inyanja.
