Imibare y’ibyavuye mu matora y’abagize Inteko Ishinga Amategeko muri Afurika y’Epfo irerekana ko ishyaka ANC riri ku butegetsi rifite amajwi 40%, ibisobanura ko bwa mbere mu myaka 30 ishize ryananiwe kugira ubwiganze bw’amajwi.
Amakuru aturuka muri iki gihugu arerekana ko ANC iri imbere n’amajwi 40%, mu gihe andi mashyaka ahanganye na yo afite amajwi 60%. Amajwi abarirwa muri 99% ni yo amaze kubarurwa.
Iri shyaka mu matora yaherukaga kuba muri 2019 ryari ryagize amajwi 57%, ibisobanura ko muri uyu mwaka ari bwo bwa mbere rigize amajwi make mu matora kuva mu 1994.
Imibare irerekana ko ishyaka The Centre-right Democratic Alliance ari ryo riza ku mwanya wa kabiri n’amajwi 22%, mu gihe MK Party riyobowe na Jacob Zuma wahoze ari Perezida wa Afurika riza ku mwanya wa gatatu n’amajwi 15%.
Muri Afurika y’Epfo nta matora y’Umukuru w’Igihugu ahaba kuko ishyaka ryegukanye intsinzi mu y’abadepite ari ryo ritanga Umukuru w’Igihugu.
Icyakora kuba ANC yananiwe kugira ubwiganze bw’amajwi bisobanuye ko hagomba kubaho ukwihuza kw’amashyaka atandukanye hanyuma ubutegetsi bugasaranganywa.
