Abarwanyi bagera kuri 31 b’umutwe wa CODECO, biciwe mu bitero kajugujugu z’igisirikare cya Congo Kinshasa ziheruka kugaba ku birindiro byazo biri muri Teritwari ya Djugu ho mu ntara ya Ituri.
Kuri uyu wa Kabiri igisirikare cya Congo Kinshasa cyavuze ko ibi bitero cyabigabye hagati y’itariki ya 23 n’iya 26 Ukuboza.
Umuvugizi wa FARDC muri Ituri, Lt Jules Ngongo, yavuze ko uduce uduce dutatu twahoze tugenzurwa na CODECO ari two twibasiwe na kajugujugu zayo.
Turimo aka Dzigene gakungahaye ku mabuye y’agaciro, aka Andisa na Dungu.
Yavuze ko nyuma y’ibitero by’indege igisirikare gikomeje ibikorwa byo gushakisha abarwanyi ba CODECO ku butaka.
Igisirikare cya Congo Kinshasa cyagabye ibitero ku barwanyi ba CODECO, mu gihe kuva muri 2017 aba barwanyi bamaze igihe bagaba ibitero byahitanye abaturage bo mu ntara ya Ituri batari bake.
