Rutahizamu Jérémy Doku yishongoye kuri Manchester United, nyuma y’uko Manchester City asanzwe akinira yari imaze kuyinyagira ibitego 3-0 mu mukino wa shampiyona y’Abongereza.
Ni Manchester United yari yakiriye Man City i Old Trafford, mu mukino wa derby y’i Manchester wabaye kuri iki cyumweru.
Ibitego bibiri bya Erling Haaland na kimwe cya Phil Foden byari bihagije ngo ikipe y’umutoza Pep Guardiola yongere kubabaza abakeba yahise isunikira ku mwanya wa munani.
Umukino ubwo wari ugeze mu minota y’inyongera, rutahizamu ukiri muto Jérémy yagaragaye ashyamirana by’akanya gato n’umunya-Brésil Anthony Santos wari umukiniye nabi.
Amafoto yafashwe mu gihe cy’uriya mukino yerekana iyi ngimbi itunga urutoki Anthony mu rwego rwo kumuha gasopo.
Doku yifashishije imwe muri ayo mafoto, yanditse ku rubuga rwa X ubutumwa buvuga ko “Nimuceceke, Manchester ni ubururu”, mu rwego rwo kwishongora kuri Manchester United ndetse no kugaragaza ko Manchester City akinira ari yo iyoboye uriya mujyi ufatwa nk’uwa kabiri ukomeye mu Bwongereza.
Gutsinda Manchester United byashyize Manchester City ku mwanya wa gatatu n’amanota 24 inganya na Arsenal ya kabiri, zombi zikaba zirushwa amanota abiri na Tottenham Hotspur ya mbere.
