Umunya-Portugal José Mourinho waherukaga kwirukanwa mu kipe ya Tottenham Hotspur yo mu Bwongereza, yamaze kugirwa umutoza wa AS Roma yo mu Butaliyani.
Mourinho yasinye muri Roma amasezerano yo kuyitoza kugeza muri Kamena 2024, nk’uko bimaze gutangazwa n’iriya kipe ibinyujije kuri Twitter yayo.
Iti: “Ikipe ishimishijwe no gutangaza ku mugaragaro ko yageze ku bwumvikane na José Mourinho bwo kutubera umutoza mushya, mbere y’umwaka w’imikino wa 2021/2022.”
Amakuru yavugaga ko AS Roma yanifuzaga Maurizio Sarri wahoze atoza amakipe ya Chelsea na Juventus, gusa inkuru y’impamo ni uko iriya kipe itigeze imuvugisha.
José Mourinho agomba gusimbura umunya-Portugal mwene wabo AS Roma iheruka gutangaza ko bazatandukana umwaka w’imikino urangiye.
Ni nyuma yo kunanirwa gufasha iyi kipe kuza mu makipe ane ya mbere muri shampiyona y’Abataliyani, dore ko iri ku mwanya wa karindwi n’amanota 55. Irarushwa amanota 14 na AC Milan ya kane, mu gihe shampiyona y’Abataliyani ibura imikino ine ikarangira.
Ni ku nshuro ya kabiri Mourinho agiye gutoza muri shampiyona y’Abataliyani, nyuma yo kuhanyura hagati ya 2008 na 2009 ari kumwe na Inter Milan yahesheje ibikombe bibiri bya shampiyona na kimwe cya UEFA Champions league, akahava yerekeza muri Real Madrid.
