Umucamanza mukuru mu rukiko rwa IRMCT rwasigariyeho urukiko mpuzamahanga rwashyiriweho u Rwanda , yatangaje ko Umunyarwanda Kabuga Felicien ukurikiranyweho kugira uruhare muri Jenoside yakorewe Abatutsi azoherezwa kuburanira muri uru rukiko Mpuzamahanga i Arusha muri Tanzania , nyuma y’uko we yasagaba ko yakomeza akaburanishirizwa mu Bufaransa ari naho yafatiwe.
Byari biteganyijwe ko Kabuga aburanishwa n’Urukiko Mpuzamahanga rw’i La Haye mu Buholandi gusa uru rwego rwatangaje ko agomba kuzazanwa Arusha nk’uko umucamanza mukuru William Sekule ukuriye urukiko rwa Arusha yabitangarije AFP.
Uyu mucamanza avuze ibi nyuma y’uko Serge Brammertz uhagarariye IRMCT yari yatangaje ko Kabuga yakoherezwa by’agateganyo mu rukiko Mpuzamahanga rwa La Haye mu Buholandi.
Kabuga w’imyaka 84 yatawe muri yombi tariki 16 z’uku kwezi afatirwa mu Bufaransa nyuma y’imyaka 26 yihisha ubutabera, akaba yari umwe mu bantu bashyiriweho impapuro zibata muri yombi na IRMCT mu 1997.
Kuwa Kane w’iki cyumweru nibwo yagejejwe imbere y’urukiko rw’Ubufaransa aburana ahakana ibyaha aregwa aho yavuze ko ibyo ashinjwa ari ibinyoma asaba ko yarekurwa agakurikiranwa ari hanze, nikaba biteganyijwe ko urukiko ruzafata umwanzuro ku busabe bwe tariki 03 Kamena 2020.
