Kapiteni wa Ipswich Town, Sam Morsy, ntabwo yambaye igitambaro cy’abakapiteni gifite amabara y’umukororombya agamije gushyigikira abatinganyi ku mukino wo ku wa Gatandatu batsinzwemo na Nottingham Forest muri Premier League kubera “imyemerere ye y’idini”, nk’uko ikipe ye yabitangaje.
Amakipe yo muri Premier League ari gushyigikira gahunda ya Stonewall yitwa Rainbow Laces igamije guteza imbere kwinjiza abantu b’ingeri zose muri siporo, iyi gahunda ikaba iri hagati y’itariki ya 29 Ugushyingo kugeza ku ya 5 Ukuboza.
Ariko, Sam Morsy, umunya-Misiri w’imyaka 33, yahisemo kutambara igitambaro cy’amabara y’umukororombya mu mukino batsinzwemo 1-0 na Forest – kandi Ipswich irakira Crystal Palace kuri uyu wa Kabiri muri iyi gahunda.
Ipswich yagaragaje ko ishyigikiye gahunda yo “kuba ikipe yakira buri wese idasumbanya abantu,” ariko yongeyeho ko yubaha icyemezo cya Morsy, umukinnyi wo hagati.
“Twishyira hamwe n’umuryango w’abaryamana n’abo bahuje igitsina (LGBTQ+) mu guteza imbere uburinganire n’ukwakira abantu bose,” Ipswich yatangaje ibi mu itangazo ryasohotse ku wa Mbere.
“Muri iyi gahunda y’uyu mwaka, abagize amakipe yacu y’abagabo n’abagore basuye umwiherero wa siporo wateguwe n’umuryango wacu witwa Foundation wibanda ku bato bafite aho bahuriye na LGBTQ+. Ikipe kandi yakoze isezerano ry’ubumwe n’uburinganire hamwe na Nottingham Forest mbere y’umukino wo ku wa Gatandatu.
“Hari ibikorwa bitandukanye biteganijwe ku mukino wacu tuzakira Crystal Palace ku wa Kabiri, harimo n’imashini nini yerekana amashusho izakoresha ubutumwa bwihariye mbere y’umukino.
“Ariko nanone, turubaha icyemezo cya kapiteni wacu, Sam Morsy, wahisemo kutambara igitambaro cy’amabara y’umukororombya kubera imyemerere ye y’idini.”
