Mukansabimana Emeritha utuye mu murenge wa Kabacuzi, akarere ka Muhanga aravuga ko isomwa ry’urubanza rw’imitungo (ikibanza n’inzu 4 zubatsemo) iherereye mu kagari ka Kamuhoza, umurenge wa Kimisagara mu karere ka Nyarugenge, aburana n’uwitwa Bazubagira Angelique.
Mu kiganiro na BWIZA TV, Mukansabimana yagize ati: “Imitungo hashize igihe kinini tuyiburana, imyaka 7 tuburana iyo mitungo. Urubanza rwatangiye 2018, twisunze urukiko ariko kugeza kuri ino saha turabona nta kintu ruri kutumarira.”
Uyu mugore avuga ko urubanza rwaburanishijwe mu rukiko rukuru rw’ubucuruzi, mu mujyi wa Kigali, rurapfundikirwa, ariko ngo umwanzuro warwo usubitswe inshuro eshanu. Ati: “Urubanza rwaraburanwe ariko ikibazo ntabwo barusoma. Haciyemo igihe kinini rwose, bararusubika, bakarusubika.”
Mukansabimana avuga ko urukiko rwari rwaranzuye ko umwanzuro w’uru rubanza uzasomwa tariki ya 17 Gashyantare 2023, ariko ntirwasomwa, agasonabura ngo byatewe n’uko “Bazubagira Angelique atabonetse”.
Ngo isomwa ryimuriwe tariki ya 27 Gashyantare 2023, na bwo ntirwasomwa, rwimurirwa ku ya Gicurasi 2023, na bwo ntibyakunda, rwongera gusubikwa tariki ya 16 Kamena 2023, rwongera gusubikwa tariki ya 14 Nyakanga 2023. Muri iki gihe cyose ngo basobanuriwe ko impamvu ari uko Bazubagira ataboneka.
Isomwa ry’uru rubanza ryimuriwe ku itariki ya 8 Nzeri 2023. Impamvu yatanzwe ni uko hagati ya Nyakanga na Nzeri, abacamanza bagiye mu kiruhuko.
Imitungo Mukansabimana n’abavandimwe be baburana na Bazubagira bamaze imyaka 29 bayipfa kuko ngo yabohojwe mu mwaka w’1994. Byahereye mu bunzi, rubura gica, biba ngombwa ko bitabaza inkiko.
