Vatikani irimo gutegura ibirori byihariye bigenewe umuryango wa LGBTQ i Roma mu cyumweru gitaha, birimo Misa, amasengesho ndetse n’urugendo rugana ku rusengero rwa Mutagatifu Petero. Ibi bikorwa biteganyijwe ku wa 5–6 Nzeri 2025 bizaba bimwe mu by’ingenzi mu birori bya Yubile ya 2025.
Ku wa 5 Nzeri, hazabera inama yiswe “Kumva ubuhamya bw’Abakirisitu ba LGBTQ”, izategurwa n’umuryango w’Abanyamerika Outreach, washinzwe n’umupadiri w’Umujesuiti James Martin. Hazitabira abakirisitu baturutse mu bihugu bitandukanye kugira ngo baganire ku bunararibonye bwabo mu Itorero Gatolika.
Nyuma yaho nimugoroba, hazabera isengesho rikuru mu rusengero rwa Church of the Gesù i Roma, rizitabirwa n’abakirisitu ba LGBTQ hamwe n’imiryango yabo. Mu gihe cy’iryo sengesho, hazerekanwa umusaraba ushushanyijeho amabara ya “rainbow”, washyizweho n’itsinda ry’abagenzi bavuye mu bihugu bitandukanye baje mu rugendo i Roma.
Ku wa 6 Nzeri, Musenyeri Francesco Savino, umuyobozi wungirije w’Inama y’Abepiskopi b’u Butaliyani, azayobora Misa muri urwo rusengero, hanyuma hasozwe n’urugendo rw’abemera barenga 1,000 bazerekeza ku muryango mutagatifu wa Bazilika ya Mutagatifu Petero. Abitabiriye bazanifatanya n’Umushumba wa Kiliziya Gatolika mu isengesho rya Angelus ribera muri icyo kibuga.
Ibi bikorwa bije bikurikira amagambo yavuzwe kenshi na Papa Francis, wabanje kuyobora Kiliziya, aho yashimangiraga ko “Kiliziya itagomba gufungira amarembo umuntu uwo ari we wese, kuko buri wese ari umwana w’Imana.”
Abasesenguzi bavuga ko ibi bikorwa bishobora kugaragaza inzira nshya ya Kiliziya mu bijyanye n’imibanire n’abemera ba LGBTQ, ariko kandi bigakomeza kuzamura impaka mu bakirisitu batandukanye ku bijyanye n’uko Ijambo ry’Imana rikwiriye gusobanurwa.
Ibirori bya Yubile ya 2025 biteganyijwe kuzitabirwa n’abantu ibihumbi baturutse impande zose z’isi, bikazibanda ku butumwa bwa Kiliziya bwo kwakira no guha ikaze abemera bose.
