Icyamamare mu biganiro bivuga ukuri, Kim Kardashian yamaze gutakaza abamukurikira bagera hafi ku ibhumbi 150 kuri Instagram nyuma yo gushyiraho ifoto ya Melania Trump, umugore wa Donald Trump yafashwe mu birori byo kurahira byabaye ku wa Mbere w’iki cyumweru.
Kardashian ufite abayoboke bagera kuri miliyoni 358 kuri Instagram, yateje impaka nyuma yo gushyirahi ifoto ya Melania Trump yambaye ingofero nini mu birori byo kurahira.
Ikigo gikora ubushakashatsi ku kumenyekanisha ibicuruzwa binyuze ku mbuga nkoranyambaga, Socially Powerful, cyagaragaje ko Kardashian yatakaje abayoboke bagera kuri 144,963 kuri Instagram kuva iyo foto yashyirwa kuri story ye. Kuri X (Twitter) naho yatakaje abandi 9,553, nk’uko Socially Powerful yabitangaje.
Bamwe mu bakurikira Kardashian banenze bikomeye iyo foto. Umwe yagize ati: “Ndumiwe… wagurishije isura yawe ku matangazo ya MAGA.”
Undi yanditse ati: “Nibura ubu tubonye uwo uri we nyakuri.”
Hari n’uwatanze igitekerezo agira ati: “Bavandimwe, mureke kumukurikira, mureke kureba ibiganiro byabo no kugura ibyo bacuruza. Kubakomeretsa ni ho bitangirira.”
Undi yarakajwe n’uko Kardashian yashyizeho ifoto ya Melania Trump “ariko ntashyiraho iya Martin” —Dr. Martin Luther King Jr wamenyekanye cyane mu rugamba rwo kurwanya ivangura.
Umunsi wo kurahira kwa Trump wabaye ku munsi w’ikiruhuko cya Leta Zunze Ubumwe z’Amerika wubahiriza umunsi w’urwibutso rwa nyakwigendera Martin Luther King Jr.
Nubwo Kardashian azwiho gushyigikira Abademokarate, yakoresheje ubucuti bw’imyaka myinshi afitanye na Ivanka Trump kugira ngo asabe se (Donald Trump) kugabanyiriza igihano Alice Marie Johnson, umugore w’umwirabura wari wakatiwe igihano cy’ubuzima bwose azira icyaha kijyanye n’ibiyobyabwenge.
