Misiyo y’Umuryango w’Abibumbye muri Repubulika ya Demukarasi ya Congo, MONUSCO, yahaye gereza ya gisirikare ya Ndolo akadege katagira umupilote (drone) kazajya kifashishwa mu kuyirindira umutekano no gukora ubugenzuzi aho iherereye.
MONUSCO yahaye iyi ndege Umuyobozi w’urwego rushinzwe amagereza, Col. Jonathan Mutombo, na we ayishyikiriza Umuyobozi wa Gereza ya Ndolo, Col. Flory Manga tariki ya 24 Nzeri 2021.
Col. Manga amaze kwakira iyi drone, yatangaje ko izabafasha mu koroshya akazi ko gucunga umutekano waho. Ati: “Izoroshya akazi kacu mu bugenzuzi, idufashe kugenzura no kumenya ibibera ahakikije gereza. Kubera ko ibibera ahakikije gereza nabyo ni iby’ingenzi dukwiye gukurikirana intambwe ku yindi.”
Gereza ya Ndolo ni imwe mu zirimo ubucucike bukabije muri RDC, ku buryo biba bishoboka cyane ko bamwe mu bafungiwemo baca mu rihumye abacungagereza.
