Ubwoba ni bwinshi muri Koreya y’Epfo nyuma y’aho abantu 51 bari barakize indwara y’icyorezo ya Coronavirus mu mugi wa Daegu bongeye kugaragaza ibimenyetso.
Igitangazamakuru cyo mu Bwongereza , Daily Mail kuri uyu wa 6 Mata 2020 cyatangaje ko aba bantu bashyizwe mu kato ahabugenewe nyuma yo gukira iyi ndwara, abaganga bongeye kubapima hashize iminsi mike, basanga yongeye kubafata. Umuhanga abivugaho iki? Iki gitangazamakuru cyaganiriye n’umuhanga mu bumenyi bw’indwara zandura muri Kaminuza ya East Anglia, Prof. Paul Hunter kugira ngo asobanure uko byaba byagenze kugira ngo aba Banyakoreya bongere kugaragaza ibimenyetso, avuga ko bishoboka cyane ko ibyavuye mu bizamini bafashwe bikemeza ko bakize bitari ukuri (Wrong result) kuko ubusanzwe ukuri kw’ibi bipimo kuri hagati ya 70 na 80 %. Hari ubushakashatsi bwavuze ko Coronavirus ishobora gusinzirira mu mubiri, bapima bakabona umuntu yarakize ariko ikongera kubyuka, bikaba bishoboka ko ari byo byabaye kuri aba bantu 51 gusa hari ubwabuvuguruje bwakorewe ku nkende bwasohotse muri Werurwe, bwagaragaje ko aka gakoko kadashobora kongera kubyuka. Prof. Hunter nawe yemeranya n’ubu bushakashatsi bwakorewe ku nkende. Mu Buyapani naho haherutse kugaragara umugore n’umugabo bakize Coronavirus nyuma bongera kugaragaza ibimenyetso ariko ntabwo haramenyekana ikibitera. Ibiva mu bipimo ni byo bivugwaho cyane kuba impavu nyamukuru y’iki kibazo.
Koreya y’Epfo: Abari barakize Coronavirus bongeye kugaragaza ibimenyetso
Sangiza iyi nkuru
Soma Izindi Nkuru
