Impuzamashyirahamwe y’Umupira w’Amaguru i Burayi (UEFA) yaciye amande y’amayero 5,000 kuri buri mukinnyi wa FC Barcelona, Lamine Yamal na Robert Lewandowski, nyuma y’amakosa bakoreye mu mukino wa Champions League wahuje Barcelona na Inter Milan mu gice cya 1/2 cy’irangiza.
Nk’uko itangazo rya UEFA ribivuga, aba bakinnyi bananiwe gukurikiza amabwiriza y’umukozi ushinzwe igenzura ry’imiti yongerera ingufu kandi ntibahita bajya aho igenzura rikorerwa nk’uko biteganywa n’amategeko.
Umutoza wa Barcelona, Hansi Flick we yahanishijwe amande y’amayero 20,000 ndetse anahagarikwa umukino umwe mu marushanwa ya UEFA kubera kurenga ku mabwiriza rusange y’imyitwarire. Umutoza wungirije, Marcus Sorg, yahawe ibihano bimwe nk’ibya Hansi Flick.
UEFA kandi yaciye FC Barcelona amande y’amayero 5,250 kubera abafana bayo bateye ibintu mu kibuga, ndetse n’amayero 2,500 kubera gucana ibishashi by’umuriro mu gihe cy’umukino.
Ibi bihano bizatangira gukurikizwa mu mukino wa mbere w’Uburayi Barcelona izakina, aho Flick na Sorg batazaba bemerewe kwicara ku ntebe y’abatoza.
