Guverinoma ya Repubulika ya Demukarasi ya Congo (RDC) yatangaje ko hakenewe abasirikare bashya ibihumbi 350 bazafasha bagenzi babo kurinda igihugu.
Bikubiye mu mushinga mushya Minisitiri w’ingabo wa RDC, Kabanda Gilbert, yagejeje kuri bagenzi be bagize guverinoma tariki ya 27 Ukuboza 2022.
Kabanda yasobanuye ko ashingiye ku batuye muri RDC babarirwa muri miliyoni 100, ibihumbi 150 by’abasirikare iki gihugu gifite ari bake, abisanishije n’uko bimeze muri Leta zunze ubumwe za Amerika no mu Bushinwa.
Nk’uko igitangazamakuru cy’igihugu, RTNC, kibivuga, Minisitiri Kabanda yagize ati: “Umubare w’abasirikare bacu w’ibihumbi 150 ni muto. Ntibahagije kuri miliyoni 100 z’abaturage. USA ifite abaturage bagera kuri miliyoni 350 n’abasirikare bagera kuri miliyoni 1.4. U Bushinwa bufite abagera kuri miliyoni 3.”
Uyu muyobozi yakomeje agira ati: “Dufite abaturage bagera kuri miliyoni 100, ndatekereza ko dukeneye byihutirwa abasirikare ibihumbi 500.”
Ibikubiye muri uyu mushinga wa 2022-2025 byatangiye gushyirwa mu bikorwa tariki ya 16 Kanama 2022. Igisirikare cya RDC kimaze kwakira abashya 18,200; bivuze ko hakibura ababarirwa mu bihumbi bihumbi 330.
