Impuguke z’Umuryango w’Abibumbye kuri Repubulika Iharanira Demokarasi ya Congo, zemeje ko hagati ya Nzeri n’Ukwakira uyu mwaka inyeshyamba zo mu mutwe wa RED-Tabara zishe abasirikare 35 bo mu ngabo z’u Burundi.
Raporo y’izi mpuguke ivuga ko abo basirikare biciwe mu mirwano yazisakiranyirije n’inyeshyamba muri Kivu y’Amajyepfo.
Iyo raporo ikomeza ivuga ko muri iyo mirwano hari n’abasirikare 15 bakomeretse, barimo na Komanda wungirije w’Ingabo z’u Burundi ziri mu ntara ya Kivu y’Amajyepfo.
Umuryango w’Abibumbye wemeje amakuru y’iyicwa ry’aba basirikare mu gihe kuva muri Nzeri uyu mwaka umutwe wa RED-Tabara wakunze kwigamba kwicira mu mirwano abasirikare b’Abarundi ndetse ukanabambura ibikoresho bya gisirikare birimo imbunda n’amasasu.
Ni imirwano uyu mutwe urwanya ubutegetsi bw’u Burundi wemeza ko waniciyemo inyeshyamba zo mu mutwe wa FDLR zifatanya ku rugamba n’Abarundi.
