Umunyamabanga Mukuru w’Umuryango w’Ibihugu bikoresha Igifaransa, Louise Mushikiwabo, yatangaje ko yigeze guterwa ubwoba na Ambasaderi wa Canada mu Bufaransa, Stéphane Dion, amuhora kwanga kongerera amasezerano umunya-Canada wahoze ashinzwe ubutegetsi muri uriya muryango.
Mushikiwabo yabigarutseho kuri uyu wa Mbere tariki ya 12 Kamena, ubwo yaganiriraga n’itangazamakuru i Quebec muri Canada.
Muri Werurwe uyu mwaka ni bwo Mushikiwabo yashyizeho umunya-Canadakazi Caroline St-Hilaire nk’umuyobozi ushinzwe ubutegetsi muri La Francophonie, asimbuye mwene wabo, Geoffroi Montpetit wari muri izo nshingano kuva muri 2021.
Ni impinduka Madamu Mushikiwabo avuga ko zatumye aterwa ubwoba na Ambasaderi Dion wamubwiye ko natavugurura amasezerano ya Montpetit azagirana ibibazo n’ubutegetsi bwa Canada.
Yagize ati: “Ambasaderi wa Canada i Paris yambwiye ko nintavugurura amasezerano ya Montpetit, nzagirana ibibazo na Ottawa. Ni ahanyu ho kwemeza niba ari ibikangisho cyangwa atari byo.”
Mushikiwabo ubwo yabazwaga n’abanyamakuru uko yakiriye ariya magambo wa Ambasaderi Dion, yasubije ko yayafashe nk’ibikangisho bigamije kumutera ubwoba.
Ati: “Birumvikana rwose. Kubera ko iyo hari amasezerano ariho turayashyira mu bikorwa, iyo arangiye kandi dufata icyemezo cyo kuyongera cyangwa kutayongera.”
“[Kongerera amasezerano Montpetit ni itegeko ntigeze nshima, cyane iryatanzwe na ambasaderi. Ariko tuzagerageza kubyuma byose.”
Umwanya w’ushinzwe ubutegetsi muri La Francophonie urakomeye cyane, kuko uwurimo afatwa nk’icyegera cy’Umunyamabanga Mukuru.
Uwufite agenerwa umushahara ugera ku 250 000$ ku mwaka.
Kutongerera amasezerano Montpetit byarakaje cyane ubutegetsi bw’i Ottawa, buhita buhagarika inkunga bwageneraga uriya muryango.
Louise Mushikiwabo uvuga ko byari ngombwa ko atangirana n’amaraso mashya, yavuze ko nyuma ya buriya burakari kuri ubu La Francophonie iri mu biganiro na Canada mu rwego rwo kuzahura umubano w’impande zombi.
