Umutwe wa M23 watangaje ko ingabo zawo zirwanyeho ubwo zagabwagaho ibitero n’ihuriro ry’ingabo za Leta ya Repubulika Iharanira Demokarasi ya Congo, bikarangira umwanzi ahunze ndetse akanata intwaro.
Imirwano hagati y’impande zombi yaramukiye mu bice bikikije umujyi wa Sake wo muri Teritwari ya Masisi, uruhande rw’inyeshyamba rugashinja ingabo za Leta kuba ari zo zaruteye.
Umuvugizi wa M23 mu bya politiki, Lawrence Kanyuka, mu itangazo yanyujije ku rubuga rwa X yavuze ko ingabo za ARC/M23 zashoboye kurinda abaturage ibitero bya FARDC n’abo bafatanya ku rugamba mu duce twa Sake, Macafe, Mitumbara, Lushoga, Kagundu no mu nkengero zatwo.
Yakomeje agira ati: “Biciye mu bwitange budacogora mu kurengera abaturage b’inzirakarengane, ingabo za AFC/M23 zagaragaje ubunyamwuga n’ubushake mu kubungabunga umutekano n’ituze mu turere twabohowe”.
Yavuze kandi ko “Icyemezo cy’ihuriro ry’ingabo z’ubutegetsi bwa Kinshasa cyo guta intwaro zazo, amasasu n’ibikoresho bya gisirikare ku rugamba ni ikimenyetso cyerekana ko ingabo za ARC zikora neza”.
Mise à jour à 11h00, le 16 mars 2024.
L'Armée Révolutionnaire Congolaise (ARC) a défendu les populations civiles contre les attaques des forces du régime de Kinshasa à Sake, Macafe, Mitumbara, Lushoga, Kagundu et leurs environs.
Avec un engagement sans faille envers la… pic.twitter.com/33w1D72KGQ
— Lawrence KANYUKA (@LawrenceKanyuka) March 16, 2024
Amafoto M23 yashyize hanze yerekana imbunda ziganjemo izo mu bwoko bwa AK-47, machine gun imwe, ibisasu, amasasu ndetse n’ibikoresho by’itumanaho ivuga ko byatawe n’Ingabo za Leta ubwo zahungana.
Imirwano yongeye kubura hafi ya Sake nyuma y’iminsi mike iki gice kirimo agahenge.
