Umutwe wa M23 watangaje ko ku wa Gatanu tariki ya 31 Gicurasi watwitse ikindi gifaru cy’Igisirikare cya Afurika y’Epfo, kiba icya gatanu utwitse.
Ni amakuru yemejwe n’umuvugizi w’Igisirikare cy’uyu mutwe, Lt Col Willy Ngoma.
Uyu musirikare mu butumwa yanditse ku rubuga rwe rwa X yavuze ko icyo gifaru cyatwikiwe mu gace ka Mubambiro ko muri Teritwari ya Masisi.
Iki gifaru cyiyongera ku bindi bine M23 yemeza ko ku wa Kane w’iki cyumweru yatwikiye hafi y’Umujyi wa Sake muri Masisi.
Igisirikare cya Afurika y’Epfo mu itangazo cyasohoye ku wa Gatanu na cyo cyemeje ko hari ibifaru byacyo byatwitswe, ndetse kivuga ko hari n’abasirikare 13 bacyo bakomerekejwe na M23.
Uyu mutwe unemeza ko ku wa Kane hari imodoka zirimo ebyiri z’ibifaru wafashe.
