Amakuru akomeje gucicikana kuva kuri uyu wa Kabiri nimugoroba hirya no hino ku mbuga nkoranyambaga ndetse yananditswe n’ikinyamakuru Chimpreports, aravuga ko Umuyobozi w’ubutasi w’umutwe w’inyeshyamba za M23 yaba yiciwe mu gitero cy’indege zitagira abapilote mu burasirazuba bwa Congo. Ni amakuru M23 yemeje mu itangazo ryayo ivuga ko abayobozi 2 b’ingabo ba zo bishwe nubwo itavuze amazina.
Abayobozi batangaje ko kuri uyu wa Kabiri, itariki 16 Mutarama, Colonel Castro Elise Mberabagabo yapfuye igihe ingabo za FARDC zagabaga igitero simusiga ku birindiro bya M23 i Kitchanga, muri Teritwari ya Masisi ku wa kabiri.
Abenegihugu bavuze ko bumvise ibisasu biturika mu gihe ingabo za Congo zateraga ibisasu ku birindiro bikomeye by’izi nyeshyamba mu gitero gitunguranye nk’uko Chimpreports ivuga.
Umwe mu bahaye amakuru iki kinyamakuru cyo muri Uganda yagize ati: “Mberabagabo yanabaye umuyobozi ushinzwe ububanyi n’amahanga wa M23”, akomeza agira ati: “Urupfu rwe ni igihombo kinini ku mutwe w’inyeshyamba kuko yari umutima nyawo w’umutwe.”
Castro binavugwa ko afite ubwenegihugu bw’u Bwongereza ndetse n’umugore w’Umwongerezakazi, ndetse ngo akaba ari n’umunyemari ufite imitungo muri Uganda, London no muri RDC nk’uko chimpreports ivuga.
Nta gihe kinini gishize Igisirikare cya Repubulika ya Demokarasi ya Congo cyakiriye drones zo kugaba ibitero cyaguze mu Bushinwa, zikomeje gukoreshwa mu gutera ibirindiro bya M23 bitandukanye ariko ahanini ugasanga bihitana n’abaturage b’abasivili.
Izi ndege zitagira abapilote zikaba zikomeje kuba ikibazo gikomeye ku mutwe wa M23 uvugwaho kuba mu myaka umaze waranononsoye amayeri y’imirwanire ya Guerilla yakomeje gukoresha mu gukubita inshuro ingabo za Congo n’abafatanyabikorwa bazo batandukanye ku ntambara yo ku butaka.
Mu itangazo M23 yashyize ahagaragara mu gitondo cyo kuri uyu wa Gatatu, yemeje ko igitero cya FARDC ku birindiro byayo cyahitanye ba komanda bayo babiri nubwo itavuze amazina, ibishimangira amakuru yakomeje gutangazwa.
