Imirwano ikomeye iravugwa guhera mu gitondo cyo kuri uyu wa Gatanu, itariki 27 Gashyantare 2026, muri Teritwari ya Masisi, mu Ntara ya Kivu y’Amajyaruguru. Iyi mirwano yahuje abarwanyi ba AFC/M23 n’Ingabo za Congo ziri gufashwa n’inyeshyamba za wazalendo, ahitwa Kinyumba, hafi ya centre ya Nyabiondo.
“Guhera mu gitondo hari kumvikana amasasu menshi mu nkengero za Nyabiondo. Hari imirwano hagati ya M23 n’ihuriro rya FARDC, Wazalendo I Kinyumba muri Teritwari ya Masisi,” uyu ni umuturage wo muri ako gace utifuje ko amazina ye atangazwa.
Iyi nkuru dukesha Kivu Morning Post iravuga ko, igisirikare cya leta cyazindutse gitera ibisasu muri ako gace gikoresheje drones. Nibura abasivili babiri bakomeretse mu gace ka Isiro. Iki gitero cyateye ubwoba mu baturage baho.
Iyi mirwano mishya iravugwa mu gihe indi mirwano yabereye mu midugudu myinshi yo mu mirenge ya Katoyi na Osso Banyungu, aho igisirikare cya Congo, gifatanyije na wazalendo, cyari cyagabye ibitero ku birindiro bya AFC/M23.
